Strákarnir fá erfitt verkefni í fyrsta leik deildarbikarsins er nýkrýndir Reykjavíkurmeistarar Fram etja kappi við þá í Egilshöll n.k. laugardag kl: 17:00
Fyrir þá sem komast ekki svona utarlega á Stór-Selfoss svæðið þá er hægt að horfa á leikinn á netinu á SportTV.
Hvetjum alla til að kíkja á strákana, nú fer þetta að verða gaman.
Strákarnir luku keppni í Fótbolti.net mótinu í dag með því að leggja Keflavík í Reykjaneshöllinni. Lokatölu í leiknum voru 0-1 og var það Viðar Örn Kjartansson sem skoraði sigurmarkið í fyrri hálfleik. Selfoss endaði þar með í 7.sæti í þessu upphitunar móti fyrir upphitunarmótið. En hafa ber í huga að liðið er ekki fullmótað ennþá og langt í mót.
Að því sögðu þá skrifaði Ingólfur Þórarinsson undir tveggja ára samning við Selfoss á dögunum sem eru mjög góðar fréttir. Ingó átti ekki sérstakt tímabil í fyrra hjá losaralegu liði Víkinga og það virkar ekki að sjá hann í öðrum búningi en Selfssbúningum. Hann á nóg inni og gæti orðið lykilmaður hjá okkur í sumar.
Annars fengum við það líka staðfest í kvöld að Ingó fer ekki til Baku til að fylgja sínu lagi í Eurovision, en hann var höfundur lags sem hafnaði í 2.sæti. Góðar fréttir fyrir Selfoss liðið a.m.k. og eitthvað rámar okkur í að hann hafi sungið um það að lenda í öðru sæti í þessari ágætu keppni.
Að auki voru tveir leikmenn til skoðunar í leiknum gegn Keflavík, annar þeirra kemur frá S-Afríku og heitir Moyo Modise. Hann er 28 ára og hefur leikið með U21 og U23 ára landsliði Suður-Afríku og í suður Afrísku deildinni, auk þess sem hann hefur leikið í neðri deildum í Englandi með Rochdale, Mossley, Altrincham og síðast Ashton United.
Hinn leikmaðurinn heitir Allan Arenfeldt Olesen og er mjög spennandi leikmaður sem gæti búið að reynslu sem Selfoss þarf á hæsta leveli. Olesen er 29 ára í dag en á að baki 46 landsleiki fyrir Danmörku í yngri landsliðunum. Þar af 22 með U21. Árið 2000 var hann m.a. valinn talent of the year á U19 ára leveli í Danmörku.
Hann hóf ferilinn hjá Brönby og spilaði með þeim 47 leiki frá 2000-2004 og vann m.a. deild og bikar. Næstu fjögur ár á eftir tók hann með FC Nordsjælland þar sem hann spilaði 109 leiki áður en hann gekk til liðs við Randers. Hjá þeim spilaði hann 20 leiki árið 2009 en datt úr liðinu næsta tímabil á eftir og var látinn fara. Þá endaði hann hjá úrvalsdeildarliði Haugasund í Noregi og spilaði 9 leiki árið 2010. Síðasta tímabil spilaði Olesen í Finnsku úrvalsdeildinni.
Engum sögum fer af því hvernig þessir ágætu menn voru að standa sig í leiknum en það er aldrei að vita nema Tómas sjóði saman eins og eina leikskýrslu.
Deildarbikarinn hefst bráðlega og Selfossliðið er meira og meira að taka á sig þá mynd sem það mun hafa í sumar.
Laugardaginn 4 febrúar verður hið árlega styrktarball knattspyrnudeildar UMFS fyrir karla og kvenna flokka, og það er hið rómaða BOLTABAND sem leikur fyrir dansi, í Boltabandinu er að þessu sinni eru þeir Njörður Steinars og Addi Braga úr Bjórbandinu, Leifur Viðarsson úr OFL, Hebbi, Gunnar Óla, Hanni Bach og Kalli Bongo úr Skítamóral (en þetta er upprunalega bandið fullskipað eða svo gott sem) og hafa þessir snillingar allir lofað gríðarlegu stuði og almennri skemmtun.
Húsið opnar kl: 23:00 og stendur ballið fram á nótt. Miðaverð er 2000 kr en einnig er hægt að nálgast miða í forsölu á 1500 kr. hjá stelpunum í mfl. kvenna alla þessa viku. Eins verða miðar seldir í forsölu á meðan firmamótinu stendur.
BACARDI RAZZ OG BACARDI OAKHEART verða á dúndurtilboði allt kvöldið í Hvíta Húsinu eða á 1000 kr.
Dagurinn hefst eins og venjulega á Guðjónsmótinu sem haldið er þriðja árið í röð. Guðjónsmótið er haldið til minningar um frábæran félaga og vin Guðjón Ægi Sigurjónsson. Um er að ræða firma og hópakeppni þar sem hver leikur er 1 x 7 mínútur
Það er búið að fylla þetta mót af liðum (ekki hægt að hafa fleiri en 24) en þeir sem ekki ætla að spila eru hvattir til að kíkja við og hvetja sitt lið enda mæta þarna flestallir Selfyssingar sem sparkað hafa í bolta hér í bæ sl. 30-40 ár eða svo ásamt nokkrum sem ekki hafa sparkað í bolta en spila samt, öðrum til skemmtunar.
Keppt er í fjórum riðlum og einn þeirra spilar í gamla íþróttahúsinu í Sólvallaskóla en hinir í Iðu (Íþróttahúsi FSu).
Mótið hefst klukkan 9:30 um nóttina og er spilað í báðum húsum á þeim leiktíma. Hér má sjá hvernig skiptist í riðla ásamt því að með fylgir smá kynning á hverju liði.
Riðill 1. kl: 09:30 í IÐU
SET – Bergsteinn byggir líklega sitt lið upp á starfsmönnum Set eins og áður en þetta lið er allajafna eins fastheldið á heimamenn og lið Atletico Bilbao á Spáni er á að hafa Baska í sínu liði.
Myrra - Sigurvegarar sl. 2 ára með mörgum af nánustu ættingjum Guðjóns heitins innanborðs. Pressan á þessu liði er gríðarleg og mikið sálfræðistríð hafið frá liðum sem telja sig hafa eitthvað í Myrruliðið.
Intersport – Laufey Guðmunds er að byggja upp mjög sterkt lið gamalla og efnilegra leikmanna, liðið límir Palla Guðmunds líklega á miðjuna og með hann þar getur nákvæmlega allt gerst.
JP/Árborgir – Óskar Sig formaður Selfoss er mjög kröfuharður á sitt lið og vill sérstaklega sjá eitthvað í ár frá feðgunum Þorsteini Daníel og Steina Magg, jafnvel þó að Steini kunni bara badminton.
Raforkuvirki – Ingólfur sonur Jóns Finns í Árvirkjanum er á bak við þetta lið, bróðir hans hefur sést halda á körfubolta en ég er alls ekki viss um að Ingólfur hafi séð fótbolta áður.
Skóbúð Sportbær – Mikið áfall fyrir þetta lið að Ingvar í Skóbúðinni af öllum mönnum hefur lagt skóna á hilluna, en Hilla (ath stórt H) er að gera sitt allra besta til að fylla hans skarð. Elsti sonurinn, Ingvi Rafn fer fyrir liðinu og hún er þegar búinn að búa til framtíðarleikmann fyrir yngri flokka Sportbæjarliðsins. Annars gæti verið Vestmannaeyjabragur á þessu liði og það væru vonbrigði að sjá þá ekki a.m.k. með gítar á bekknum.
Riðill 2 kl 09:00 Í VALLASKÓLA
Stofan Hársnyrtistofa - Eitthvað segir mér að foringi þessa liðs, Gústi Lill hafi nú þegar tryggt sér búningaverðlaunin en eins og bara í lífinu sjálfu er Gústi Lill til alls líklegur í fótbolta.
Skjálfti Stuðningsmannasveit Selfoss/ Pylsuvagninn Selfossi – Góða við þetta lið er að ef illa gengur koma þeir líklega til með að styðja hvern annan vel. Ljótt að setja þá í riðil sem byrjar níu um nóttina en ef þeir sofa bara í íþróttahúsinu kvöldið og nóttina fyrir mót hef ég fulla trú á þeim.
Bónus - Enski miðvörðurinn og blái scouserinn Andy Pew fer fyrir Bónus liðinu sem er klárlega mikill bónus fyrir þau. Svekkjandi fyrir Bónus en Andy er að spila með öðru liði! Guð hjálpi Bónus liðinu þá.
AB-Skálinn – Hér er lið sem er mjög líklegt að setja nokkrum sinnum tveggja stiga mark enda þær systur Katrín Ýr og Anna María í forsvari og þær vita báðar vel hvar markið er.
Smíðandi - Líklega er best að Gestur Þráinns rifji bara upp galmla handboltatakta og verði bara hafður í marki þegar Smíðandi mætir AB Skálanum til að við klúðrum ekki sumrinu hjá mfl. kvenna í þeim leik. Smíðandi er annars ávallt með sterkt lið og gefa ekkert eftir í sínum leikjum.
Ungm.félagið Hvöt – Hér eru á ferðinni strákar úr Grímsnesinu, eins og er koma þeir sem nokkuð óskrifað blað til leiks.
Riðill 3 kl: 12:00 Í IÐU
Lögmenn Suðurlandi KVK - Svava Svavars hefur aftur grafið upp gamlar kempur úr Old Girls með sér í lið. Hér vonast ég til að sjá stormsenterinn Agnesi Guðna í framlínunni og allt undir 10 mörkum frá henni eru vonbrgið.
Kaffi – Krús – Tommi Þórodds ætlar að vera með come back á knattspyrnuvöllinn en hann hefur ekki spilað þessa íþrótt í 10 ár eða síðan hann kom inná í 4 mínútur í Sunnlensku utandeildinni með stórliði Tantra. Það sem gerir innkomu Tomma í þeim leik eftirminnilega ennþá í dag er að hann er sé eini sem undirritaður hefur séð skríða heillanga leið út af knattspyrnuvelli, uppgefinn. Þetta var fyrir 10 árum og hvernig standi er hann í núna?
TM Legends – Þetta lið er heldur betur sigurstranglegt fyrir mót enda með Stebba Hólmgeirs sem þjálfara og líklega rótara því hann hefur með sér töluvert magn af poppurum. Þetta lið inniheldur einnig þrjá fyrrum leikmenn Selfoss liðsins, einn þeirra er sonur Gísla Jóns og Emmu Granz, einn er að vinna sem tannlæknir með Steina Púlla og sá þriðji er fyrirsæta hjá Hagkaup eða eitthvað enda næstum því Herra Ísland hér um árið.
Bílasala Selfoss Rögnvaldur Jóhannesson – Leiðinlega lítið komið af yfirlýsingum frá Rögga fyrir þetta mót, mætti halda að það væri einhver bilbugur á honum að finna? Hann mun þó ekki svíkja og ég hef trú á að hann horfi á hvern leik eins og meðal aðalsmaður í Saudi Arabíu lítur á leik hjá landsliði þjóðarinnar. Þeir sem gera vel og t.d. skora fá gríðarlega vel umbunað, rolex úr, nýjan Benz og læti en þeir sem standa sig ekki er refsað grimmilega, t.d. DBS reiðhjól ´87 módel og 12 ára gamalt bleikt Barbie úr. Til sönnunar á þessu má m.a. benda á að Valli Reynis er í þessu liði og hann yfirgefur staðinn ekki hjólandi.
Þ.G.Á. - Árni Leó leiðir lið föður síns, það er eins með hans lið, óvenju lítið um yfirlýsingar en það má ekki vanmeta Tottenham menn í ár og Árni og co því til alls líklegir framan af móti en klúðra því svo öllu í restina, gott ef ekki með magapest…aftur.
Lögmenn Suðurlandi KK – Torfi Ragnar er með karlalið Lögmanna og þeir hafa bara eitt markið mið í þessu móti, ekki tapa fyrir liðinu hennar Svövu (kvk lið Lögmanna).
Riðill 4 kl: 14:30
HÖR 82 – Hér er líklega áhugaverðasta lið mótsins en fyrir því fer Hlöðver Örn Rafsson eins og nafn félagsins segir til um. Hann fær með sér gamlar kempur úr Fram og stendur ´82 fyrir titil sem þeir félagarinir unnu saman árið 1882. Heyrst hefur að menn eins og Gauti Laxdal, Pétur Ormslev og Arnljótur Davíðsson ætli að mæta til leiks og miðað við það má fastlega gera ráð fyrir grimmilegri fallbaráttu, enda eins og máltækið segir, leikmenn geta yfirgefið Fram en þú tekur ekki Fram úr leikmönnunum.
TRS – Ávallt aðdáunarvert að sjá liðsmenn TRS utanvallar og stuðningur við liðið ávallt framúrskarandi, fánar og læti. Minna að frétta innanvallar reyndar en Gunnar Bragi hefur þó verið að spila FIFA 2012 stíft undanfarið ásamt því að horfa á EM í handbolta og segist hafa fundið ekta leikkerfi í innanhúsfótbolta. Spila stífa 6-0 vörn og skipta svo í 4-3-3 í sókninni.
Landsbankinn – Flestir í þessu liði hafa verið að gera góða hluti utanvallar á leikjum Selfoss, alls ekki innanvallar. En til að leysa ákveðin vandamáli í marki, vörn, miðju og sókn var ákveðið að kaupa Jóhann Bjarnason til liðsins á lokadegi félagsskiptagluggans og treystir liðið alfarið á hann. Þetta eru almennt talin vera stærstu félagaskiptin sem áttu sér stað í janúarglugganum í Evrópu.
Hávarður Ísfirðingur – Þetta mýrarboltalið lið sýndi það í hittifyrra að þeir geta svo sannarlega spilað þegar þeir komast upp úr drullunni og er til alls líklegt og stefna á sigur í riðlinum. Trausti Sigurberg Hrafnsson er þekktasti leikmaður liðsins hér á Suðurlandi en andlegir leiðtogar þeirra eru meðlimir Reo Speedwagon og Helgi Björnsson.
Amma Gunna – Þórir Jóhanns smalar saman ættingjum sínum í þetta lið sem flestir eiga það sameiginlegt að vera allir undan henni Gunnu komnir. Formaður Liverpool klúbbsins, Sigursteinn Brynjólfsson var þarna á meðal í fyrra en það hjálpaði liðinu ekki hætis hót.
Sjóvá – Þríeykið Addi, Njörður og Tóti fá vini sína, flesta fædda 78 með sér í þetta lið og er þetta enn eitt liðið sem ætlar sér að sigra þennan riðil og auðvitað mótið í heild. Addi Braga forstei Sjóvá á Selfossi fer líklega fyrir sínum mönnum en hann hefur þann hæfileika að geta talað svo hratt að hann getur stjórnað báðum liðum frá hliðarlínunni í einu.
Úrslitaleikirnir munu hefjast strax og riðlakeppni líkur.
Veitt verða verðlaun fyrir 3 efstu sætin auk annara aukaverðlauna. Þetta er viðburður sem ekki má láta fram hjá sér fara, taumlaus gleði og grín og misgóðir sparksnillingar að reyna fyrir sér í knattspyrnu. Sigurvegarar síðustu tveggja ára eru Myrra snyrtistofa og veit ég fyrir víst að þeim verður veitt veruleg keppni þetta árið.
Láttu þig ekki vanta Laugardaginn 4 feb og taktu þátt í frábærum degi með okkur til minningar um frábæran félaga.
Sjáumst á laugardaginn
Babu (ásamt Sævari Gísla og Tomma Þórodds)
Oftar en ekki er básúnað mikilvægi yngri flokkastarfsins og hversu mikilvægt það nú er að fá inn í meistaraflokk uppalda leikmenn, ekkert rangt við það og ég tek heilhugar undir. En af hverju er þetta svona mikilvægt? Hvað hefur þetta verið að skila mfl. Selfoss mörgum leikmönnum undanfarin ár og/eða bara virkum starfsmönnum í kringum liðið? Jafnframt hvað er hægt að búast við mörgum uppöldum leikmönnum úr hverjum árgangi hjá liði sem er að keppast við að komast upp í efstu deild eða halda sæti sínu í efstu deild?
Þetta eru vangaveltur sem eru að hluta til sprottnar út frá umræðu um stemmingu og aðkeypta leikmenn á síðasta tímabili, sumir vilja meina að þetta hafi verið ástæða minni stemmingar á vellinum í fyrra og er spurning hversu sanngjörn sú gagnrýni er? Eins langar mig að skoða betur hvað mikið af þessum sem æfa í yngri flokkum eru raunverulega að skila sér upp í mfl. Selfoss og hvort ekki megi gera betur til að hlúa að þeim fjölda sem æfir á aldrinum 17-20 ára.
Ef við höfum í huga að það eru örfá ár síðan Selfoss komst loksins upp í næstefstu deild (hvað þá efstu deild), þá tekur það skammarlega stuttann tíma að telja upp þá leikmenn og stráka sem hafa skilað sér upp í mfl. Selfoss eða bara inn í starf félagsins. Tökum af handahófi árgangana fædda 1977 – 1987, stráka sem eru 25-35 ára í dag og er nokkuð útséð með að eru ekki að fara skila sér upp í mfl. Selfoss sem leikmenn (en vonandi sem virkir félagsmenn).
Höfum viðmiðið bara að leikmaður hafi skilað sér upp ef hann náði einu tímabili eða meira sem leikmaður mfl. Selfoss.
Árgangur 1977 (Enginn leikmaður)
Mfl leikir – Enginn úr þessum árgangi festi sig í sessi sem leikmaður mfl. Selfoss svo ég muni í fljótu bragði.
Óvíst hvort einhver hafi náð mfl. leik, en útilokum ekki að Ólafur Þórarinsson hafi náð einhverjum leikjum en hann var þó ekki uppalinn hér á Selfossi.
Viðbót: Guðmundur Ingi var líklega sá sem náði lengst úr þessum árgangi og á nokkra leiki með mfl. (Undirritaður hélt að Gummi væri ´76 módel).
Árgangur 1978 (Tveir leikmenn)
Mfl leikir – Njörður Steinars, Siggi Tobba
Njörður er nú líklega meðal bestu uppöldu leikmanna sem komið hafa upp á Selfossi. Hann fór fljótlega í bæinn og spilaði í Úrvalsdeild áður en hann tók hlé frá fótbolta, hann kom svo aftur heim á Selfoss. Siggi Tobba var síðan lykilmaður eins og bræður sínir þar til hann lenti í meiðslaveseni og hætti að spila allt of snemma, rétt eins og Njörður. Jón Steindór er einnig ´78 módel og hefur þjónað liðinu betur en flestir og gerir enn, hann er engu að síður uppalinn Bliki og telst því ekki alveg með í þessari upptalningu.
Þetta var nokkuð góður árgangur og þarna voru nokkrir strákar sem virkilega fannst framhjá þeim gegnið í vali á Selfossliðinu, svo mikið að þeir stofnuðu Árborg ásamt öðrum úr árgöngunum í kring og hafa þar spilað fjölda leikja og tekið þátt í miklu félagslífi.
Viðbót: Guðjón Skúli gleymdist hérna en hann var mjög efnilegur markmaður sem var alla yngri flokka með Selfoss áður en hann fluttist upp á Skaga, þá farinn að banka á dyrnar í mfl. Selfoss.
Árgangur 1979 (Einn leikmaður)
Mfl. leikir – Hallgrímur Jóhannsson
Sterkur árgangur en það er óneitanlega synd að enginn hafi náð að hasla sér völl í fótboltanum utan neðstu deildar. Teddi og Gummi Á voru meðal bestu manna í þessum árgangi og urðu þó báðir lykilmenn í Árborg. Halli er uppalinn á Eyrarbakka og telst því ekki beint til unglingastarfs Selfoss en hann var þó kominn ungur í Selfoss.
Árgangur 1980 (Enginn leikmaður)
Mfl leikir – Enginn, Gunnar Björn markmaður var meðal bestu yngri flokka markmanna landsins en flutti snemma í bæinn og spilaði ekki með Selfoss í meistaraflokki (Viðbót, Gunnar var á bekknum 2-3 tímabil og á nokkra æfingaleiki). Aftur góður árgangur en lítið sem skilaði sér í mfl. Reyndar flutti áberandi besti leikmaður ´80 árgangsins, Valdi Þórs í Árbæinn og valdi seinna handbolta sem sína íþrótt. Aðrir sem báru af í þessum árgangi eins og Einar Karl og Halli (í OFL) voru meira og minna meiddir en spiluðu báðir með Árborg og hafa tekið þátt í miklu starfi þar.
Árgangur 1981 (Einn leikmaður)
Mfl. leikir - Lárus Arnar
Nokkrir í þessum árgangi sem höfðu getuna til að ná langt í fótbolta hefðu þeir valið það. Lárus Arnar náði lengst og náði að vinna sér sæti í mfl. Selfoss en var ekki mörg tímabil og hefur spilað með Árborg og Ægi undanfarin ár. Svipað má segja um Atla Rafn.
Eins var Helgi Valur (sem er landsliðsmaður í dag) hérna sem krakki en stóra spurningin er væri hann landsliðsmaður í dag hefði hann ekki farið í Fylki ungur? Marvin Vald tók síðan hræðilega ákvörðun ungur og valdi körfubolta.
Árgangur 1982 (Fjórir leikmenn)
Mfl. leikir – Helgi & Hlynur, Elías og Máni.
Hér er einn fulltrúi ennþá að spila, Elías Örn markmaður og 2-3 aðrir sem náðu að vinna sig inn í mfl. liðið. Helgi og Hlynur eiga báðir yfir 100 leiki hjá félaginu en hættu ungir og færðu sig yfir í Árborg (mikið til vegna krefjandi náms hjá báðum). Máni Birgis var á tímabili kominn í miðvörðinn en spilaði ekki lengi með meistaraflokki.
Fleiri áttu séns eins og Stefán Guðmundsson sem skoraði að vild í yngri flokkum, hann fór ásamt bróðir sínum í Fram til að reyna þróast sem leikmaður áður en báðir enduðu í Árborg.
Árgangur 1983 ( Tveir leikmenn)
Mfl. leikir – Henning , Ingi Rafn
Þessi árgangur skilaði tveimur leikmönnum upp í mfl. en báðir eru þeir fæddir og uppaldir á Stokkseyri og voru ekki í yngri flokkum Selfoss. Henning er mjög góður leikmaður en hefur lítið spilað með Selfoss, bæði vegna meiðsla og eins þar sem hann fór snemma í lið í efri deildum. Ingi hefur verið í hópnum eftir nokkur ár í eyjum og staðið fyrir sínu.
Árgangur 1984 (Þrír leikmenn)
Mfl leikir – Arilíus, Einar Ottó, Ingþór
Líklega gjöfulasti árgangur fyrir mfl. Selfoss í áratugi enda þrír leikmenn sem koma hérna upp sem allir hafa verið lykilmenn í liðinu í gegnum tíðina. Ingþór hefur þó verið herfilega óheppinn með meiðsli og er hættur í fótbolta. Einar Ottó var valinn besti leikmaður síðasta tímabils hjá Selfoss ásamt Babacar og Alli hefur ávallt verið mikilvægur partur af leik liðsins eftir að hann kom aftur eftir stutta dvöl í eyjum. Einar Ottó hefur nú gefið það út að hann sé búinn að leggja skóna á hilluna og ætli ekki að taka slaginn í Pepsi deildinni á næsta ári og óvíst er hvað Alli gerir þar sem hann er nú búsettur fyrir vestan. Að missa alla þessa þrjá á einu bretti er hroðalegt, innan sem utan vallar og dýrt að svona menn hætti allir í fótbolta fyrir þrítugt og raunar á besta aldri fyrir knattspyrnumenn, ef þeir eru þá hættir.
Árgangur 1985 (Einn leikmaður)
Mfl. leikir – Jón Guðbrands
Einn leikmaður sem kemur upp úr yngri flokka starfinu hérna og hann er eins og frændur sínir Elías og Einar Ottó af mikilli Selfoss fjölskyldu. Jón fór snemma í höfuðborgina til að spila á hærra leveli, kom svo aftur þegar Selfoss fór upp um deild og er núna líklega hættur í fótbolta. Agalegt m.v. hversu efnilegur leikmaður Jón var á sínum tíma og enn á ný dýrt fyrir Selfoss að njóta ekki krafta svona leikmanna.
Árgangur 1986 (Tveir leikmenn)
Mfl. leiki – Ingó Tóta og Jóhann Ólafur (+Andri Freyr)
Þarna koma tveir mjög góðir leikmenn sem báðir fóru mjög snemma frá Selfossi í efrideildar lið á höfuðborgarsvæðinu áður en þeir komu aftur heim og áttu stóran þátt í uppgangi félagsins undanfarin ár. Andri gerði nákvæmlega það sama nema hann er auðvitað ekki uppalinn á Selfossi heldur Hellu. Hann var búinn að vera í Val í smá tíma áður en hann kom aftur á Selfoss. Það er vonandi að þessir strákar verði ennþá að spila eftir 5-8 ár en m.v. félaga sína sem komið hafa upp úr yngri flokka starfi Selfoss undanfarin ár er tölfræðin ekki með þeim.
Viðbót: Guðmundur Marteinn á einhverja 30 leiki fyrir meistaraflokk og var efnilegasti leikmaður Selfoss árið 2005. Hann fór seinna í Gróttu og er fyrirliði þeirra í dag. (sjá ummæli hér að neðan).
Árgangur 1987 (Enginn leikmaður)
Mfl. leikir – Enginn, viðurkenni að það má vera að mér yfirsjáist einhver hérna en eini svo ég viti sem spilar með Selfoss fæddur 1987 er Agnar Bragi sem er uppalinn í Fylki.
Ef við tökum þetta saman og skoðum hvað hver árgangur hefur skilað mönnum lengi í mfl. Selfoss
1977 – Enginn
1978 – Einn lykilmaður í mörg ár en allir hættir fyrir eða rétt um þrítugt
1979 – Einn lykilmaður í nokkur tímabil en hættur fyrir þrítugt.
1980 – Enginn
1981 – Einn leikmaður sem var hættur ca. 21 árs.
1982 – Einn lykilleikmaður sem er ennþá í liðinu og tveir aðrir mjög góðir félagsmenn innan sem utan vallar meðan þeir spiluðu með Selfoss.
1983 – Einn leikmaður ennþá í hóp og ekki útséð með hinn, báðir tóku góða pásu frá mfl. Selfoss.
1984 – Þrír mjög öflugir leikmenn sem hafa nánast alla tíð spilað með Selfoss en virðast allir vera hættir núna fyrir þrítugt.
1985 – Einn leikmaður og hættur rétt rúmlega 25 ára.
1986 – Tveir leikmenn sem ennþá eru lykilmenn í dag.
1987 – Enginn
Auðvitað verður að taka með inn í reikninginn að Selfoss hefur tekið mjög góðan kipp undanfarin ár og það er eðlilegt að nokkrir leikmenn hafi ekki getu, orku eða tíma í að taka þátt í því á nýju og hærra leveli. Það er fullkomlega eðlilegt að þegar lið fer að ná betri árangri og færa sig milli deilda þá hellist margir úr lestinni og auðvitað verður það erfiðara að komast í liðið að sama skapi. Það er ansi fáheyrt að lið komist upp í efstu deild eða standi sig þar á uppöldum leikmönnum einum saman og hvað þá að þau lið haldi dampi. ÍA gerði þetta 1991 með frábæru liði og náði að halda dampi en eftir það er fátt um fína drætti. Það helst reyndar ágætlega í hendur að þau bæjarfélög/hverfi sem skyndilega fá margar nýjar barnafjölskyldur á sitt svæði komi upp með góða yngri flokka nokkrum árum seinna. Fylkir gerði þetta fyrir mörgum árum, Fjölnir seinna og HK og Breiðablik hafa gert þetta nýlega ásamt Selfoss og Haukum. Allt lið sem fengu marga nýja iðkendur á skömmum tíma. Eins er t.d. hægt að nefna FH sem er með frábært unglingastarf en líka fínt fjármagn til að kaupa leikmenn og eins bjóða ungum leikmönnum góða samninga.
Það þarf meira til að halda dampi í efstu deild heldur en öflugt unglingastarf og hver uppalinn leikmaður sem hverfur á braut er mikið áfall fyrir viðkomandi lið og það kostar oftar en ekki helling að fá einhvern í staðin. Það á kannski ekki alveg við í tilfelli Selfoss og helst þannig á meðan við spilum meðal þeirra bestu, en oftar en ekki er setið um bestu leikmenn liða eins og Selfoss sem náði glæsilegum árangri með nánast eingöngu uppalda leikmenn. Haukar eru t.d. núna að missa marga af sínum bestu mönnum eftir að hafa tekið mjög svipað ferðalag og Selfoss með líkri uppbyggingu. Fjölnir náði góðum árangri með blöndu af uppöldum leikmönnum og góðum lánsmönnum en gengur illa að halda sínum bestu mönnum í dag. Breiðablik hefur ekkert náð að styrkja sig eftir að hafa misst sína bestu menn og t.d. HK er fallið niður í 2.deild og alveg á kúpunni eftir að hafa verið í efstu deild fyrir stuttu á heimamönnum. Það virðist vera ansi erfitt fyrir þessi félög að halda stemmingunni og óneitanlega hefur maður áhyggjur af því að þetta sé staðan hjá okkar mönnum núna.
Ef það verður lendingin að við missum Einar Ottó og Arilíus á einu bretti fyrir þetta tímabil er ljóst að það myndast skarð sem erfitt og dýrt er að fylla. Ef við horfum síðan á liðið sem fór upp í efstu deild árið 2009 og þá heimamenn sem hafa horfið á braut síðan þá er hægt að bæta við mönnum eins og Sævari Gísla og því miður er ekki neinn þannig leikmaður til sölu á íslandi og Selfoss hefur klárlega ekki efni á honum. Jón Steindór er svipað dæmi en hann var afar traustur leikmaður í áratug eða svo. Jón Guðbrands var að spila margar stöður og lykilmaður í liðinu. Henning var meðal okkar bestu leikmanna og það er erfitt að fá mann í hans stað. Gummi Tóta er eitt mesta efni sem komið hefur héðan og hann er farinn og Agnar Bragi var ekkert með í fyrra. Þetta er stór biti á þremur árum.
Þannig að hvað er það sem stuðningsmenn Selfoss vilja? Það er eitt að segja að það eigi að byggja liðið upp á heimamönnum en ekki bara fylla það af útlendingum eða aðfluttum Íslendingum, en allt annað að actually stjórna liðinu og mannaráðningum í það. Tala nú ekki um þegar þú þarft á sama tíma að uppfylla kröfu um að halda úti liði í efstu deildar klassa. Það er í besta falli fáránlega ósanngjarnt að tuða yfir því að verið sé að fylla liðið af leikmönnum sem ekki eru aldir upp á hjá félaginu á sama tíma og fáránlega stór partur af þeim sem aldir eru hérna upp eru að hætta langt fyrir aldur fram eða yfirgefa liðið. Þá er ekki einu sinni tekið inn í dæmið að margir þessara manna fóru upp yngri flokka hjá 2.deildar liði Selfoss. Pepsi deildin er allt annað og miklu erfiðara dæmi.
Síðan við fögnuðum árið 2009 hafa menn eins og Sævar Gísla, Gummi Tóta, Jón Guðbrands, Einar Ottó, Arilíus(ekki öruggt), Ingþór, Jón Steindór, Henning og eflaust fleiri yfirgefið liðið. Átta lykilmenn.
Skoðum liðsmynd sem var tekin af liðinu eftir síðasta leik árið 2009 (á hana vantar m.a. Ingþór, Inga Rafn(var í ÍBV) og Gulla Jóns).
Efri röð: Dóri Bjöss, Jón Daði, Árni Páll, Einar Ottó, Jón Guðbrands, Arilíus, Henning, Agnar Bragi, Stefán Ragnar, Trausti, Óskar Ar, Ómar Vald, Gunnar Borgþórs.
Neðri röð: Siggi Eyberg, Ingvi Rafn, Gummi Tóta, Birkir Hlyns, Andri Freyr, Jóhann Ólafur,, Jón Steindór, Sævar Gísla, Elías, Hjörtur Hjartar, Ingó Tóta og Tommi Þórodds.
(Starfsmenn merktir með bláu, strikað yfir þá sem ekki spila lengur með mfl.)
Það er ekki hægt að fá átta Íslendinga í staðin í sömu gæðum nema setja deildina á höfuðið. Eins er langt frá því að vera raunhæft að ætlast til þess að þessa leikmenn sé að finna í yngri flokkum Selfoss. Þið sjáið hér að ofan hvað þeir hafa verið að skila okkur í gegnum tíðina og reyndar er nú staðreyndin sú að í liðinu núna eru þrátt fyrir allt ennþá margir uppaldir leikmenn, strákar sem líklega eru þeir bestu og efnilegustu sem komið hafa upp úr yngri flokka starfi Selfoss, strákar í efstu deildar klassa.
Þeir sem teljast til Selfyssinga (eða allt að því) í liðinu í dag og eru að fara spila næsta sumar eru Jóhann Ólafur, Sigurður Eyberg, Stefán Ragnar, Andri Freyr, Jón Daði, Ingi Rafn, Ingó Tóta og Viðar Kjartansson. Auk þeirra eru t.d. Agnar Bragi sem hefur bara spilað með Selfoss í meistaraflokki og Kjartan Sig sem er héðan af svæðinu.
Setjum þetta öðruvísi upp, fyrir utan Gumma Tóta eru bara ekki fleiri „Selfyssingar“ að spila í þeim gæðaflokki sem farið er fram á að leikmenn Selfoss í dag spili, efstu deildar klassa.
Hvað er þá til ráða, jú reyna að fá til sín nýja leikmenn í staðin, Íslendinga ef þeir eru fáanlegir á réttum forsendum eða þá erlenda leikmenn ef þess þarf. Þetta er „því miður“ bara staðreynd hvort sem fólki líka þar eða ekki og það væri fínt ef þeim stuðningsmönnum liðsins sem líkar illa við þessa þróun hafi þetta í huga þegar þeir tuða yfir hverjum nýjum leikmanni.
Stjórnin hjá Selfoss (a.m.k. formaðurinn) hefur verið við völd undanfarin fimm ár. Á þeim tíma hefur liðið þrisvar farið upp um deildir, einu sinni verið í þriðja sæti og einu sinni fallið, það var úr efstu deild. Deildin er ekki farin á hausinn og að því er ég best veit eru fjármálin hjá félaginu í ágætum farvegi (held þessu fram án ábyrgðar). Ég ætla fyrir mitt leyti að treysta þessum mönnum sem tóku það að sér að sjá um þessi mál fyrir okkur áfram, undanfarin ár hafa verið þau skemmtilegustu sem stuðningsmenn Selfoss hafa upplifað og ég fyrir mitt leyti vill ólmur halda áfram að sjá Selfoss í Pepsi mörkunum og af og til í beinni útsendingu. Það er svo miklu skemmtilegra en þetta 2.deildar lið sem við áttum í 14 ár og missti undantekningalaust sína bestu menn um leið og þeir voru nógu góðir til að fara í annað og metnaðarfyllra félag.
Eins er ég þess fullviss að yngri flokkastarfið hjá Selfoss sé í miklu miklu betri farvegi en það var og það eru nú þegar farnir að koma upp leikmenn sem eiga fullt erindi í efstu deild. Yngri flokkarnir eru síðan að ná árangri og þar er að finna nokkra efnilega stráka sem þó eru ekkert að fara koma inn í meistaraflokk alveg strax.
Þjálfari mfl. Selfoss gæti ekki verið mikið reyndari og hann er með góða yfirsýn yfir allt starfið hjá félaginu og puttana í öllu (beint eða óbeint) bak við tjöldin. Eins er 2.flokkur á góðu róli og með mjög góðan þjálfara og það er vonandi að þetta haldi áfram á þeirri braut.
Það að missa svona marga uppalda leikmenn á stuttum tíma er agalegt og sérstaklega þar sem margir þeirra eru á besta aldri. Það er þó vonandi að þeir haldi allir áfram að vinna fyrir félagið. Því það er ekki bara leikmenn á þessum aldri sem manni hefur fundist vanta stundum, heldur fleiri félagsmenn sem ekki voru nógu góðir í fótbolta en hafa alveg áhuga á að starfa í kringum félagið á einn eða annan hátt.
Þeir sem fóru í Árborg náðu að skapa gríðarlega góðan félagsanda og stemmingu sem stundum var litin hornauga meðal Selfyssinga. Þetta snerist svo til við árið 2007 þegar gamlar kempur eins og Sævar, Ingó og Njörður sneru heim og rifu stemminguna upp innan sem utan vallar. Á þessu hefur liðið farið langt og það er gaman að vinna í kringum hóp þar sem stemmingin er góð. Það er spurning hvernig hægt er að halda félagsmönnum sem eru ekki alveg eru tilbúnir að taka stökkið úr 2.flokki og upp í Pepsi deildar lið. Kannski væri málið að nota Árborg sem einskonar B-lið og jafnvel leyfa 2.flokks strákum, leikmönnum utan hóps eða sem eru að koma sér af stað eftir meiðsli að fá spilatíma þar áður en þeir taka slaginn með Selfoss.
Eitthvað þarf a.m.k. að gera svo að við missum ekki alla leikmenn sem hafa tekið alla yngri flokka félagsins frá 6 ára til 20 ára út úr félaginu, hvort sem þeir færu að nýtast sem leikmenn eða bara félagsmenn.
Best að láta staðar numið hér enda kominn út fyrir efnið, tilgangurinn var að svara aðeins þeim sem hafa verið að hneykslast á innkaupastefnu Selfoss, flestir finnst mér gera það alveg án þess að velta fyrir sér ástæðunum sem liggja að baki.
Verum jákvæð og styðjum Selfoss, leikmenn koma og fara en við styðjum liðið í gegnum súrt og sætt.
Áfram Selfoss.
Einar M.
Laugardaginn 4. febrúar mun Knattspyrnudeild Selfoss standa fyrir Guðjónsdeginum 3. árið í röð. Guðjónsdagurinn er haldinn til minningar um frábæran félaga og vin Guðjón Ægi Sigurjónsson.
Klukkan 9:30 um morguninn mun hefjast í Íþróttahúsunum Iðu og við Skólavelli Guðjónsmótið í knattspyrnu sem er Firma og hópakeppni. Leiktíminn verður sá sami og í fyrra eða 1x 8 mínútur og verður spilað í riðlum þar sem efsta lið hvers riðils mun komast áfram í undanúrslit. Það er nú bara þannig að við getum einungis tekið á móti 22 liðum eða hópum þannig að það er um að gera að skrá sig sem fyrst. Skráning er hjá Sævari Gísla í síma 899-0887 og Sveinbirni Más 897-7697
Myrra - Sigurvegari síðasta árs
Veitt verða verðlaun fyrir 3 efstu sætin auk annara aukaverðlauna. Þetta er viðburður sem ekki má láta fram hjá sér fara, taumlaus gleði og grín og misgóðir sparksnillingar að reyna fyrir sér í knattspyrnu. Sigurvegarar síðustu tveggja ára eru Myrra snyrtistofa og veit ég fyrir víst að þeim verður veitt veruleg keppni þetta árið.
Að móti loknu verður svo stanslaust stuð í Hvíta húsinu á Styrktarballi Knattspyrnudeildarinnar þar sem að hið magnaða BOLTABAND mun halda uppi fjörinu fram á nótt. Baltabandið skipa þeir Njörður Steinarsson, Adolf Ingvi Bragason (bjórbandinu) Leifur Viðarsson (OFL og laga/textahöfundur fyrir Ingó) Herbert Viðarsson, Gunnar Ólason, Hanni Bach og Karl Þór Þorvaldsson (allir Skímó meðlimir) og hafa þeir lofað gríðarlegu stuði og almennri skemmtun.
Húsið opnar kl: 23:00 og stendur ballið e-h fram á nótt. Miðaverð er 2000 kr og væntanlega verður forsala og þá verður hún auglýst.
Láttu þig ekki vanta Laugardaginn 4 feb og taktu þátt í frábærum degi með okkur til minningar um frábæran félaga.
Hvíta Húsið er tilbúið í slaginn 4.febrúar
Hægt er að sjá umræðu um þennan dag á Facebook og þar er hægt að bjóða vinum að mæta.
UMFS.is Fótbolti.net