Við íþróttavöllinn á Selfossi er lítill skúr sem Stuðningsmannavefurinn kíkti í heimsókn í fyrr í dag og kannaði stemminguna. Þar inni er flugeldasala knattspyrnudeildarinnar sem nú er í hámarki og stjórnað af þeim félögum Tomma Þórodds, Sveinbirni Más og Sævari Gísla en þeir tveir síðastnefndu eru engir nýliðar þegar kemur að flugeldasölu knattspyrnudeildarinnar á Selfossi og hafa staðið vaktina þar í fjöldamörg ár (Sævar jafnvel þó hann væri samningsbundinn einhverjum smáliðum úr Reykjavík).

.

Flugeldasalan er ein af aðal tekjulindum ársins þó ávalt sé nú reynt að hafa verðið það lægsta sem er í boði á markaðnum hér í kring og því um að gera fyrir unnendur knattspyrnunnar hér í bæ að gera sér ferð á Selfossvöll og styrkja deildina ásamt því að gefa barninu í sjálfum sér smá útrás. Í ár er boðið upp á fullt af nýjum rakettum sem voru reynsluprufaðar í fyrra við góðar undirtektir en eins er heill hellingur af tertum í boði. Fyrir þá sem finnst bæði betra þá inniheldur aðal fjölsyldupakkinn risastóra rakettu, fína tertu og ýmislegt annað skemmtilegt með í bland sem heldur krökkunum (stórum sem smáum) uppteknum mest allt kvöldið og vel það.

Hér má sjá þennan skemmtilega fjölskyldupakka samansettan, stór raketta, terta og fjölmargt fleira skemmtilegt saman í pakka sem er sá alheitasti í ár.

.

Sævar Þór sem var kostinn Íþróttamaður Árborgar árið 2009 eins og við greindum frá fyrr í dag var mun meira spenntur fyrir flugeldunum og prufukeyrslu þeirra heldur en að tala um eigið ágæti. Hann sagðist þó aðspurður vera mjög ágnægður með að vera veittur þessi heiður annað árið í röð og sagði jafnframt að líkt og í fyrra væri það allt liðið sem deildi þessu titli, enda ná menn sjaldnast árangri í fótbolta nema hafa góða meðspilara með sér.

Við þetta má síðan bæta að þessi raketta sem Sævar í þann mund að kvekja í fór upp í loft, sprakk glæsilega eins og til var ætlast og prikið lenti hálfan meter frá bíl blaðamanns Selfoss.org (sem betur fer fyrir Sævar).

.

Strákarnir voru í áramótagír uppá velli og eru þar enn með rjúkandi heitt á könnunni fyrir viðskiptavini.

Þarna verða þeir til a.m.k. 22:00 í kvöld og til 16:00 á morgun

.

Tómas er ekki eins reyndur í flugeldunum og þeir Sveinbjörn og Sævar og því mun ginkeyptari fyrir umbúðunum á pakkanum heldur en innihaldi tertunnar („,)

.

Ef rétt er munað þá er Þórshamar stærsta og öflugasta tertan sem er í boði í ár, þræl keppnis alveg ef það er ennþá í tísku að segja keppnis?

.

Eins og gefur að skilja gekk erfiðlega að fá strákana í myndatöku þar sem nóg var að gera við að selja blessaða flugeldana, eins vegna takmarkaðs áhuga á fyrirsætustörfum! (þetta seinna á auðvitað ekki við um Tómas).

.

Trikkið var að ná mynd án þess að Tommi skyggði á útsýnið en hér má engu að síður sjá nokkrar af þeim litríku bombum sem í boði eru.

.

En eins og allir vita þá er ástæða flugeldasölunnar ár hvert ekki sú að nýtt ár sé gengið í garð og ekki heldur vegna þess að Skaupið er búið, nei það er vegna þess að SirrýBjörns á afmæli 1.janúar ár hvert og núna verður hún fimmtug sem þýðir að enn meira verður sprengt („,)

Það er því alveg málið að geyma stærstu bomburnar til miðnættis annað kvöld enda erum við líka að sprengja burt heilan áratug og þ.a.l. ganga inn í nýjan.

.

Eins viljum við hjá Stuðningsmannavefnum vinsamlega benda á að flugeldasala er hugsuð sem fjáröflun fyrst og fremst! Hvort sem það er fyrir starf íþróttafélaga eða Björgunarsveita og hvetjum við því samborgara okkar að beina viðskiptum sínum í öllum tilvikum til þessara aðila frekar heldur en einkaaðila í leit að skjótfengnum gróða fyrir sjálfan sig.

.

Að lokum óskum við Selfyssingum nær og fjær gleðilegs nýs árs og þökkum hið liðna. Vonandi verður næsta ár eitthvað í líkingu við skemmtunina sem árið 2009 var hjá knattspyrnudeild Selfoss.

Þessi vefur fór ekki í loftið fyrr en eftir tímabilið í sumar og því vonumst við til þess að síðan muni vaxa jafnt og þétt á nýju ári og lesendur verði virkir í umræðunni. Það er í það minnsta stefnan og erum við mjög þakklát fyrir frábærar viðtökur það sem af er ári, þetta lofar góðu.

Með Bestu kveðju

Fyrir hönd Selfoss.org

Einar Matthías

Deila

Það kemur líklega ekki nokkrum manni á óvart að íþróttamaður Árborgar árið 2009 var Sævar Þór sonur Gísla Jóns og Emmu Graenz.

.

Sævar Þór hefur farið fremstur í flokki Selfyssinga síðan hann mætti aftur heim á Selfoss og uppskeran er besti árangur liðsins í sögu knattspyrnunnar á Selfossi. Þannig að tilnefninginn kom ákaflega lítið á óvart og er ekki úr vegi að óska Sævari innilega til hamingju með þennan titil, annað árið í röð. (Hér má sjá góða samantekt frá því í fyrra sem tekin var við sama tækifæri)

.

Aðspurður hafði Sævar hverja klisjuna af annari á reiðum hönum „Þetta er frábær heiður, allt liðið á þessa viðurkenningu….“. En nánar verður líklega greint frá viðbröðgum Sævars eftir að stuðningsmannavefurinn hefur í raun náð af honum tali! („,)

.

Tölurnar ljúga ekki og Sævar Þór Gíslason er klárlega Íþróttamaður Árborgar 2009 og megi hann alveg endilega vinna sér þennan bikar til eignar árið 2010.

Á þessari óskýru mynd sem við stálum í góðfúslegu óleyfi frá heimasíðu sveitarfélagsins má einnig sjá Ágústu Tryggvadóttir sem var valin Íþróttakona Árborgar 2009 fyrir mjög góðan árangur í frjálsum, en þar hefur Ágústa verið afar öflug undanfarin ár. Við óskum henni að sjálfsögðu einnig til hamingju.

Deila

Í gær mánudag opnaði flugeldasala knattspyrnudeildar sem staðsett er við íþróttavöllinn, Engjavegi 50 Selfossi.

Í ár erum við með fullt af nýjum rakettum og tertum sem voru reynsluprófaðar í fyrra og vöktu mikla athygli hjá þeim sem fengu að skjóta. Við þurfum ekki að taka það fram að við ætlum að vera ódýrastir eins og í fyrra, en við viljum sérstaklega taka það fram að boðið verður upp á kaffi og með því, fyrir gesti og gangandi á meðan flugeldasalan stendur yfir.

Látum nú alla vita hvar bestu og ódýrustu flugeldarnir fást, styrkjum stoðir íþróttahreyfinguna og gerum næsta knattspyrnuár enn glæsilegra en það sem nú er að líða.

Opið er á íþróttavellinum:

mán. 28. des 14.00-20.00
þri. 29. des 10.00-22.00
Mið. 30. des 10.00-22.00
Fim. 31. des 10.00-16.00

Deila

Stelpurnar í mfl. kvenna á Selfossi vilja óska öllum gleðilegra jóla og farsældar á nýju ári. Þökkum einnig fyrir stuðninginn á árinu sem er að líða og þökkum öllum þeim sem lögðu leið sína á völlinn til þess að styðja við bakið á okkur á okkar fyrsta meistaraflokks ári :)

Það sem hefur drifið á daga okkar undanfarið er að mfl. kvenna hefur spilað 2 æfingaleiki undir stjórn nýs þjálfara, Helenu Ólafsdóttur. Það má heldur betur segja að okkur hafi verið hent út í djúpu laugina í okkar fyrsta æfingaleik sem var gegn meistaraliði Vals, þær tefldu fram ungum og efnilegum stelpum í bland við nokkrar sem voru að koma úr meiðslum eða barneignafríi. Sá leikur fór nú ekki betur en svo að við steinlágum í valnum og staðan í hálfleik var 7-0 fyrir Valsstúlkum. Ekki beint það sem maður vonast eftir en seinni hálfleikur spilaðist mun betur og fór 3-1 þar sem hin unga og efnilega Guðmunda (Gumma) skoraði 1 mark Selfoss.

Seinni æfingaleikurinn var spilaður í Kórnum þann 20. des og var gegn Haukum. Við Selfoss-stúlkur þekkjum vel til Hauka þar sem við spiluðum bæði gegn þeim í Lengjubikarnum fyrr á þessu ári og einni í 8-liða úrslitum í sumar en þá fór fyrri leikurinn 1-2 fyrir Haukum og seinni leikurinn 3-3 og þar með komust Haukar áfram í undanúrslit og að lokum unnu þær 1. deildina. Æfingaleikurinn fór 2-2 jafntefli og náðum við upp góðu spili og má segja að valsleikurinn hafi verið gott spark í afturendan. Mörkin fyrir Selfoss skoraði reynsluboltinn Anna Þorsteinsdóttir.

Við stelpurnar höfum verið í jólafríi yfir hátíðirnar en munum taka tvær Cross fit æfingar núna eftir helgi í Reykjavík í Sporthúsinu. Þar mun maður að nafni Leifur Geir leiðbeina okkur og sýna okkur hvernig á að beita sér rétt við lyftingar.

Með jóla-og nýárskveðju,

Stelpurnar í meistaraflokki kvenna.

Deila

Við hjá Stuðningsmannasíðu Selfoss óskum Selfyssingum nær og fjær gleðilegra jóla….

…hafið það sem allra best um jólin („,)

Deila

Á morgun mánudag hefst sala á jólaggjöf knattspyrnuáhugamannsins. Þetta er að sjálfsögðu árskort á völinn þ.e.a.s frítt á alla heimaleiki Selfoss sumarið 2010. Einnig veitir ársmiðinn aðgang að veitingum í hálfleik á leikjum og ýmsar uppákomur fyrir valda leiki í sumar. Auk þess verður í boði fyrir árskorthafa, óvæntar uppákomur samhliða leikjum í Deildarbikarnum, en hann byrjar nú í Febrúar.

Árskortið kostar 18.000kr fyrir einstakling og 30.000kr fyrir hjón. Hægt er að borga með eingreiðslu eða dreifa greiðslum yfir árið. Gjafakortin verða seld í Tíbrá frá og með mánudeginum 21. desember, eins er hægt að panta þau hjá Sveinbirni 897-7697 eða Tómasi 699-0660.

Deila

Á sunnudaginn þann 20. desember verður æfingaleikur hjá mfl. kvenna í Kórnum kl. 15:00 gegn Haukum.

Deila

Knattspyrnudeild Selfoss ætlar á Þorláksmessu að halda skötuveislu í Tíbrá félagsheimili UMFS við Engjaveg á Selfossi. Í boði verður veglegt skötuhlaðborð: skata, saltfiskur, síld og allt tilheyrandi meðlæti. Verð fyrir hlaðborðið er aðeins 2.200 krónur. Þetta er að sjálfsögðu opið öllum, hvort sem fótboltaáhugi er fyrir hendi eða ekki, en munið að um takmarkað sætaframborð að ræða og því um að gera að panta strax. Húsið opnar kl 11.15 og verður borinn fram matur til kl 14.00. Miðapantanir eru í síma: 897-7697 Sveinbjörn og 699-0660 Tómas. Einnig er hægt að senda inn pantanir á netfangið tommi@talnet.is

Deila

Það er gaman að geta þess að knattspyrnudeild Selfoss hélt upp á 54 ára afmæli sitt í dag 15.des.2009. Ungmennafélagið var stofnað 1936 en knattspyrnudeildin um tuttugu árum síðar. Til hamingju með daginn allir knattspyrnuunnendur á Selfossi fyrr og síðar.

Í tilefni dagsins setjum við hér inn það fyrsta sem Google dettur í hug þegar sett er inn Knattspyrnudeild Selfoss ! Líklega við hæfi miðað við sérkennilegan árstíma sem þeir hafa valið til að stofna knattspyrnudeildina („,)

Deila

Selfoss.org er að sjálfsögðu fyrstir með fréttirnar. Nú erum við fyrstir með fréttir af riðlaskiptingu KSÍ fyrir Deildarbikarinn 2010. Selfyssingar eru í skemmtilegum riðli með úrvalsdeildarfélögunum FH, Fram og Val og svo 1. deildarfélögunum Fjölni, KA, Leikni og Víking Reykjavík. Fjölgað hefur verið í riðlum og eru nú alls 8 lið í riðli. Tvö efstu liðin komast svo áfram og tvö lið sem eru með bestan árangur í 3. sæti síns riðils. Riðill Selfyssinga er riðill 2 en leikið er einföld umferð og fer hún að mestu fram í knattspyrnuhöllum landsins, þó má gera ráð fyrir jafnvel einum leik á gervigrasinu á Selfossi þegar líða fer á vorið. Ekki er komin ákveðin dagsetning á fyrsta leik, en reikna má með að hann sé snemma í febrúar.

Deila