Annað árið í röð voru stelpurnar bókstaflega grátlega nálægt því að tryggja sér sæti í efstu deild kvenna! Núna lutu þær í lægra haldi fyrir Þrótturum 3-1 í vægast sagt dramatískum leik því þessar lokatölur segja sannarlega ekki alla söguna.

Hér má sjá umfjöllun fótbolta.net um leikinn og hérna má svo sjá viðtal við Helenu Ólafs sem segir eiginlega allt sem segja þarf.

Liðið var algjörlega frábært í allt sumar og átti sannarlega skilið að fara upp enda var þetta aðeins annar tapleikurinn á þessu tímabili.

Við gerum þennan leik líklega betur upp bráðlega og svo verður auðvitað farið betur yfir tímabilið í heild við tækifæri hér á orginu.

Það þarf svo líklega ekki að taka það fram að strákarnir lutu í lægra haldi fyrir Valsmönnum á mánudag og má sjá snubbótta umfjöllun mína á fótbolta.net hérna og ögn hressari textalýsingu hérna.

Deila

Nú liggur mikið við og mikið að gerast hjá andstæðingum okkar í næsta leik, Völsurum. Það er ljóst að þörf er á spekingi andstæðinganna fyrir þennan leik og höfðum við því að sjálfsögðu samband við skemmtilegasta speking andstæðinganna, heiðursmanninn Heiðu í Dal sem ætti að vera Selfyssingum að góðu kunnur enda legend á hinni sálugu síðu Fyrstudeildarfjélagsins sem var hip og kúl er Selfoss lék í þeirri deild.

Heiða í Dal kemur m.a. inn að stjórastaða Vals sé stærri en Selfoss sem er auðvitað bull, eins reynir hann að segja Selfyssingum til þegar kemur að því að versla í Pullaranum án þess að svo mikið sem minnast á að auðvitað kaupir maður bara breiðloku þar og auðvitað er svo þriggja klúta fyrirlestur um stöðu félagsins í dag, klárlega þess virði að renna yfir þetta.

Sökum leti er oftast hent fram mjög svipuðum spurningum í þessum dagskrárlið, en spurningum um það hvernig stemmingin sé hjá Valsmönnum á næstum ekki við núna!! Hvað er eiginlega að gerast hjá þínum mönnum þessa dagana og hver er þín skoðun sem almenns aðdáanda á
…Gulla Jóns þjálfara
…Berki fyrverandi formanni knd
…þessari uppsögn fjórmenninganna í stjórn Vals?

Ég held, vona og trúi að hinn almenni Valsmaður vilji sjá Gunnlaug Jónsson áfram í brúnni hjá Val. Í fyrra varð óþarfa fjaðrafok í fjölmiðlum þegar hann ákvað að hætta með lið Selfoss til að taka við einu af stóru störfunum í íslenskum fótbolta (með fullri virðingu fyrir Selfossi og öðrum liðum), og gefið  var út að þessi ráðning væri ekki einnar nætur tjöldun. Markmið Vals hlýtur að vera að byggja lið sem er hæft um að gera atlögu að titlum ár eftir ár, og til að það sé hægt verður að byggja umgjörð í kringum það sem segir Ungir fótglímumenn – hjá Val er best að vera.

Það gefur ekki góð skilaboð út á við að reka og ráða þjálfara eftir úrslitum síðustu umferðar. Því miður hefur ára óþolnmæðis vomað yfir Hlíðarenda undanfarin ár, og margir búnir að týna tölunni yfir fjölda þjálfara liðsins. Það er mín trú að það versta sem hægt væri að gera í stöðunni væri að reka Gulla og ráða einhvern „big shot“ til að taka stjórnina. Það gæti vel verið að Guðjón Þórðar eða Ron Atkinson myndi koma með titilinn 2011 á Hlíðarenda, en við hljótum að vera að líta til þess að vilja hafa mann sem byggir upp lið sem gerir atlögu að titlinum 2011, 2012, 2013 og svo framvegis.

Með uppsögn stjórn knattspyrnudeildar þá veit ég eiginlega ekki hvað skal segja. Mér finnst fnykur af þessu öllu saman, og sérkennilegt að stjórnin virtist koma fram af heilindum alveg fram á síðustu stundu. Til dæmis bauð formaður hennar upp á guided tour um Hlíðarenda í vikunni, svaraði spurningum æstra aðdáenda á spjallborði og virtist vera að bera á sárin sem opnuðust með fréttaflutningi RÚV í byrjun vikunnar. Svo allt í einu er 80% stjórnarinnar farin með reyk og látum og eftir standa spurnignarnar.

Nú ríður á að fá sanna Valsmenn inn í stjórnina sem vinna sína vinnu eins og stjórn á að gera – ekki í framlínunni og einbeita sér að því að skapa framkvæmdastjórum félagsins það vinnurými sem þeir eiga skilið. Nú þurfum við að halda áfram að búa til það sem kynnt var fyrir einu ári síðan – knattspyrnudeild karla sem laðar að þá efnilegustu (við komum ekki úr stæsta póstnúmeri landsins og erum ekki með Breiðabliks kalíber af ungum iðkendum), starfar eftir kjörorðum sr. Frikka og býður ekki í allt sem hreyfist eins og loðað hefur við Knattspyrnufélagið Val.

Þetta var nú alveg þriggja klúta ræða, er það ekki?

Fyrri leikurinn á Vodafone vellinum var hörkuleikur sem þó endaði vel fyrir þína menn, hvaða leikmaður Selfoss myndir þú segja að væri líklegastur til að setja strik í reikninginn hjá Völsurum í þessum leik?
Mér hefur fundist Yao-Yao ansi sprækur í þeim klippum sem vinir okkar RÚV hafa verið að sýna mér, og eins aukaspyrnur yngri Veðurguðsins þarna verið stórhættulegar, Gummi heitir hann það ekki? Ég er annars að vona að einu strikin sem Selfoss setur í reikning Valsmanna verði þrjú strik í stigatöfluna Valsmegin

Hver í Valsliðinu hefur komið þér mest á óvart í sumar?
Ég verða að setja að þetta er eitt furðulegasta tímabil sem ég hef lifað. Eilífar hræringar og mannabreytingar í glugganum, sumir að spila betur en í mörg ár og aðrir gert í brók. Mér finnst Kjartan Stullu búinn að eiga besta tímabilið sitt í nokkur ár, Haukur Páll er eins og ferskur vindur inn á miðjuna og er verðugur arftaki Bjössa þar. Stefán Eggerts í bakverðinum búinn að vera góður og Jón Vilhelm er að koma sterkur inn núna eftir meiðslatímabil.

Ég verð held ég samt að segja að sá í kringum Valsliðið sem er búinn að koma mér mest á óvart er hinn almenni aðdáandi. Hann hefur farið mikinn á spjallborðum og kaffistofum eftir tapleiki, en horfið eftir sigurleiki. Hann er búinn að gleyma öllu sem talað var um fyrir mót um uppbyggingu á Hlíðarenda, því að búa til nýtt lið og þá staðreynd að Gulli Jóns tók við andlega gjaldþrota meistaraflokki. Margoft í sumar er ég búinn að spyrja mig að því á hverju menn áttu eiginlega von fyrir mót? Héldu menn að lið með 5-6 nýja byrjunarliðsmenn myndi hlaupa heim með dolluna? Evrópusæti?

Skil þetta ekki alveg, enda er það ekki enduruppbygging í mínum huga að ætlast lið þess að ungur þjálfari byggi Róm á einum degi.

Hvern þurfum við mest að óttast (besti leikmaður)?
Besti leikmaður Vals í ár og vonandi næstu tíu ár er Haukur Páll Sigurðsson. Púnktur.

Hvar liggja helstu veikleikar Valsara, það má alveg segja frá þeim, ég lofa að kjafta ekki?
Þeir liggja í litlu sjálfstrausti, frekar hægu liði heilt yfir og að okkar sterkasta lið er ekki enn fundið.

Nú fengum við Viktor Unnar í síðasta leikmannaglugga og hefur hann reynst okkur vel, en gerðist eitthvað meira hjá ykkur á þessum tíma og hvernig finnst þér þeir leikmenn sem gengið hafa til liðs við Val 2010 hafa verið að nýtast liðinu?
Ég er búinn að vera mjög ánægður með nýju leikmennina. Þeir hafa flestir spilað vel. Ég fæ ekki nóg af að lýsa ást minni (platónskri) á Hauki Páli, Jóni Vilhelm hafði ég ekki mikla trú á fyrir mót en hann hefur verið að koma til, Stefán bakvörður minnir mig á sjálfan mig þegar ég var að spila (nema að hann er actually góður í fótbolta, kannski meira svona minnir hann mig á sjálfan mig eins og ég hefði viljað vera), Rúnar Már er framtíðarmiðjumaður í liðinu og útlendingarnir eru búnir að vera bara ágætir.

Hvernig kemur Gulli til með að spila þennan leik (líklegt byrjunarlið/leikkerfi)?
Það er hið sívinsæla 4-3-3 sem ríður rækjum á Valsheimilinu en byrjunarliðið er álíka ágiskanlegt og næstu úrslit Liverpool

Hef spurt áður en reyni aftur nú (leti sjáðu til), ef þú mættir fá einn úr Selfoss í Val, hver yrði fyrir valinu?
Sá sem er skemmtilegastur í klefanum og getur spilað báða hálfleikina af fullum krafti! -> (innsk. sem sagt Tommi Þórodds)

Megum við ekki búast við góðri mætingu Valsmanna á leikinn?
Ég er ekki endilega viss um það, enda tímasetningin á honum ekki alveg hugsuð með vinnandi fólk í huga. Ég sjálfur mæti hinsvegar, enda veit ég fátt skemmtilegra en að keyra niður Kambana og reyna svo að muna eftir hraðamyndavélunum hjá Kotstrandarkirkju. Það er pláss fyrir einn aftan á mótorhjólinu mínu Valsmenn ef einhvern vantar far!

Ætlar þú sjálfur að mæta og þá jafnvel kíkja í Pylsuvagninn eftir leik?
Það held ég að sé nánast 101% öruggt. Ég vil minna frændur mína á Selfossi á það að pylsu á að snæða með tómatsósunni neðst, steikta lauknum þar fyrir ofan og remúlaðinu efst. Þetta er þrautreynt og aðrar útgáfur eru villutrú.

Hvernig fer og hverjir skora?
Ég held að Jón Vilhelm Ákason skori í 0-1 sigri Vals. Hann hefur verið að koma sterkur inn upp á síðkastið. En markið verður ljótt, það er öruggt.

Heiða í Dal heitir í raun Björgvin og þökkum við honum kærlega fyrir sitt innlegg í umræðuna

Babú

Deila

Unnið að mestu úr grein á Sunnlenska.is (sem ég gerði reyndar líka).

Selfoss og Þróttur Reykjavík skildu jöfn í fyrri leik liðanna í undanúrslitum 1.deildar kvenna. Lokatölur voru 1-1 og því ljóst að um hörkuleik verður að ræða í Laugardalnum næstkomandi miðvikudag enda tryggir sigurvegari þessa einvígis sér sæti í efstu deild á næsta ári.

Helena gerði nokkrar breytingar á liðinu fyrir þennan leik, Veronika var t.d. ekki með og í stað hennar kom bara ynga módelið af henni í miðvörðin eins var Anna María færð í bakvörðin til að kljást við fljóta kantmenn Þróttara, liðið var því svohljóðandi:

Liðið var svona:

Bekkur: Aníta G, Íris, Guðbjörg, Fransiska og Sif

Thelma Sif var djúp á miðjunni og Anna Þorsteins aðeins fyrir framan hana. Aníta Lísa var svo á mið miðjunni á meðan Eva Lind og Gumma voru mun framar. Þ.e.a.s. þessi liðsuppstilling er kannski ekki alveg 100% rétt enda takmörk fyrir því hvað ég er snjall í word press. Eva Lind og Gumma skiptust á að vera á hægri og vinstri kanti og hlupu allann leikinn í kringum Olgu sem beið eins og hrægammur á teignum.

Leikurinn fór annars rólega af stað og greinilegt að mikið lá undir, sól og blíða var á Selfossi og aðstæður hinar ágætustu fyrir um 400 áhorfendur sem lögðu leið sína á gervigrasvöllinn. Eftir 26.mínútna leik tókst Selfyssingum þó að brjóta varnarmúr gestana á bak aftur er hin stórefnilega Guðmunda Brynja Óladóttir lagði boltann örugglega í netið eftir frábæra undirbúning frá hinni 15 ára Evu Lind Elíasdóttir. Fimm mínútum seinna var heimaliðið ljónheppið að fá ekki dæmt á sig víti er Margrét Hólmgeirsdóttir komst í gegn og virtist ná að sparka í boltann á undan Dagnýu Pálsdóttir markmanni Selfyssinga. En dómarinn Smári Stefánsson var með allt sitt á hreinu og dæmdi einungis hornspyrnu við litla hrifningu Þróttara.

Þróttarstúlkur mættu sprækar í seinni hálfleikinn og er rúmlega korter var liðið af honum komst Margrét Hólmgeirsdóttir ein í gegn eftir gott hlaup upp vinstri kantinn og lagði boltann af öryggi í fjærhornið án þess að Dagný markmaður næði að koma neinum vörnum við. Eftir jöfnunarmarkið var leikurinn tiltölulega rólegur, Dagný í markinu þurfti varla að koma við boltann það sem eftir lifði leiks og Selfyssingum gekk illa að sækja að marki gestanna fyrir utan tvær úrvals tilraunir frá Guðmundu Brynju. Fyrra færið kom eftir frábæra sendingu frá Önnu Þorsteinsdóttir sem sendi Guðmundu eina í gegn en Ása Aðalgeirsdóttir markmaður Þróttar var vel á verði. Seinna færið kom síðan í uppbótartíma er Guðmunda átti hörkuskot fyrir utan teig sem Ása markvörður gestana varði meistaralega.

Niðurstaðan því 1-1 jafntefli í hörkuleik.

Næsti leikur er á fáránlegum tíma í Laugardalnum, á miðvikudaginn klukkan 17:30 og rétt úrslit í þeim leik gætu þýtt sæti efstu deild og því óhætt að hvetja alla sem mögulega eiga á því kost að mæta á völlinn.

Babú

Deila

Í kvöld sannaðist að fótbolta á ekki að spila á mánudögum. Ekki á Íslandi, ekki í Englandi,, ekki neinsstaðar.

Máser eða Tommi koma jafnvel með skýrslu um þennan leiðinda leik á þessum leiðinlegasta velli landslins og líklega bara evrópu.

Ég hata allavega mánudaga.

Babú.

Deila

Ef þið smellið á þessa mynd sem tekin er af frétt á Sunnlenska.is færist þið yfir á myndasyrpu frá vígslunni á Selfossvelli og leik Selfoss og Keflavíkur.

Talandi um Gumma Kalla (sem tekur þessar myndir) þá var hann í spjalli í leikskránni sem Óli Tage útbýr fyrir alla heimaleiki. Ef þið ýtið á lesa meira má sjá skemmtilega sögu GK frá hvernig þetta var hér áður fyrr á Selfossvelli. Samkepppnin við Sævar Gísla og Gumma Strump og samstarfið við Tóta Snorra…

Lesa meira

Deila

Þetta er ekkert flókið, í kvöld átti sér stað einn af hápunktunum í sögu knattspyrnudeildar Selfoss. Fjörið byrjaði á því að presturinn okkar hann Óskar var fenginn til að skýra Babú-stúkuna formlega og fyrst hann var mættur var platað hann til að blessa völlinn líka. Þar með var búið að nýta klerkinn og í stað þess að setja hann í yfirvinnu var fengið strákana í Skjálfta til að leiða alla hina 1.200 áhorfendurna í faðir vorinu. Kjartan Björnsson stjórnaði þessari vígsluathöfn annars að röggsemi og auk hans tóku þeir Grímur Hergeirsson, formaður UMF Selfoss og Þórir Hákonarson, framkvæmdastjóri KSÍ til máls áður en Eyþór Arnalds, formaður bæjarráðs söng lagið He Hermaur.

Öðlingurinn Jóhann B. Konráðsson sem eitt sinn var kenndur við WV Bjölluna sína var mættur á Selfoss til að stjórna útsendingu Stöð 2 Sport frá leiknum en þetta er í fyrsta skipti sem Selfoss er sýnt í beinni útsendingu í sjónvarpi. Ef við miðum við að sjónvarp hóft hér á landi 1968 þá er ljóst að þetta er frábær millitími.

Hvað leikinn sjálfan varðar þá var ég með textalýsingu hér og vann svo umfjöllun út frá leiknum hér í kjölfarið. Þarna reyni ég að vera töluvert meira hlutlaus en t.d. þessi hérna var um daginn og því ekki úr vegi að hreinsa aðeins hlutleysið út fyrir umfjöllun hérna á Selfoss.org.

---

Við þurftum að gera nokkrar breytingar á liðinu fyrir leik í dag  Kjartan Sig var ásamt öðrum í meistaraflokki að flytja varamannaskýlin af gervigrasinu yfir á aðalvöllinn og fór við það í bakinu og er því ekki með í dag. Stefán Ragnar meiddist hinsvegar í upphafi leiks gegn Stjörnunni og er ennþá að jafna sig á því. Jón Bóndi Guðbrandsson fór því í miðvörðinn, eitthvað sem hann hefur ekki verið þekktur fyrir áður. Sævar Gísla kom aftur inn eftir rothögg gegn Haukum og Bóló var aftur kominn á bekkinn. Villingurinn Andri  Freyr var hinsvegar í banni í dag.

Liðið var svona:

Gestir dagsins voru Keflvíkingar sem er við hæfi enda ávalt verið „miklir“ kærleikar milli þessara bæjarfélaga, raunar svo miklir að Joey Drummer og félagar í Puma sveitinni lögðu ekki í það að koma austur fyrir fjall í kvöld. Strákunum í Skjálfta sem og öðrum stuðningsmönnum til sárra vonbrigða. Rúmlega 1.200 manns mættu á völlinn var stúkan full vel fyrir leik.

Keflvíkingar voru ekki alveg búnir að lesa handritið af þessari opnunarhátíð á Selfossi og um leið og presturinn var búinn að vígja völlinn formlega tóku Keflvíkingar mest öll völd á vellinum og eftir rúmlega tíu mínútna leik spólaði Magnús Þórir Matthíasson sig glæsilega í gegnum vörnina með góðum þríhyrning við Magnús Sverri og komst einn í gegn. Magnús Þórir átti ekki í vandræðum með að leggja boltann í hornið framhjá Jóa sem þó verður ekki sakaður um þetta mark. Mjög vel gert hjá þeim nöfnum en vörn Selfoss leit ekki vel út í þessu marki.

Eftir markið reyndu strákarnir að sækja á vörn Keflavíkur en náðu með engu móti að snúa á frábæra rangstöðuvörn þeirra. Raunar voru sóknir gestana áfram mun hættulegri og áttu þeir að að bæta öðru marki við á 17.mínútu. Fyrst spólaði Magnús Sverrir sig í gegn en skot hans var varið á línu af Martin Dohlsten. Í sömu sókn komst Hörður Sveinsson í úrvalsfæri en skot hans fór yfir. Algjör nauðvörn þarna hjá varnarmönnum Selfoss sem voru mjög heppnir að sleppa með þetta.

Á 20.mínútu fékk Viktor Unnar gult fyrir hraustlega tæklingu á Hólmari Erni og hefði líklega fengið rautt spajld væri Martin Atkinson að dæma þennan leik. Stuttu seinna átti hann ágætt skot að marki sem fór yfir. Fljótlega í kjölfarið fékk Yao Yao aukaspyrnu sem hann tók sjálfur og sendi inn í teiginn á Jón Guðbrandsson sem skallaði yfir markið.

Strax í kjöllfarið brunuðu Keflvíkingar í sókn og bættu við öðru marki og svo gott sem drápu stemminguna á Selfossi. Guðmundur Steinarsson sendi glæsilegan bolta innfyrir á Hörð Sveinsson sem slapp einn í gegnum vörnina en Jói varði stórvel frá honum. Frákastið fór þó beint aftur á Hörð sem gat lítið annað gert en að klára færið. 0-2 fyrir Keflavík og eins og Willum Þór sagði í viðtali eftir leik þá hefur hann aldrei tapað eftir að hans lið kemst í slíka stöðu.

Á 44.mínútu skoraði Jón Guðbrandsson fyrir Selfoss en markið var réttilega dæmt af þar sem Arilíus Marteinsson braut á Lasse Jörgensen markmanni. Gunnar Jarl góður dómari leiksins með þetta allt á hreinu og flautaði til leikhlés um leið og klukkan sýndi 45.mínútur. Þess ber að geta að markmaður Keflavíkur er ekkert tengdur lögregluhundinum Lassí, ekki svo ég viti.

Í leikhléinu nýtti Gummi Ben tímann vel, sagði sýnum mönnum að hann vildi þrjú mörk og tók Gunnar Borgþórs útaf og setti í hans stað Einar Ottó Antosson inná miðjuna með Yao Yao. Þessi skipting virkaði eins og vítamínsprauta á heimamenn sem komu frískir til leiks í seinni hálfleik og var Sævar Gísla að því er virtist í úrvalsfæri strax á fyrstu mínútu seinni hálfleiks en náði ekki til boltans.

Mínútu seinna var Yao Yao hinn smávaxni miðjumaður sem elskar okkur öll dæmdur rangstæður í örugglega sjötta skipti í leiknum. Fljótlega í kjölfarið á því fengum við aukaspyrnu sem áðurnefndur Yao Yao framkvæmdi. Hann sendi háan bolta inn á teig sem Jörgensen misreiknaði illilega í markinu og náði ekki að kýla frá. Þess í stað fór hann á kollinn á Jóni Guðbrandssyni og þaðan í netið.

Stuttu seinna fékk Arilíus Marteinsson gult fyrir brot rétt fyrir utan vítateig. Úrvalsfæri fyrir Guðmund Steinarsson sem tók lúmskt skot undir vegginn en Jóhann Ólafur var með allt á hreinu í markinu og varði skotið auðveldlega. Selfyssingar voru þó öllu sprækari eftir markið og áhorfendur voru miklu mun sprækari og létu vel í sér heyra.

Á 62.mínútu átti Jóhann Ólafur eitt af tilþrifum helgarinnar er hann sá glæsilega við Herði Sveinssyni sprækasta leikmanni Keflvíkinga. Hörður slapp gjörsamlega einn í gegn og hafði allann tímann í heiminum til að ákveða hvernig hann ætti að plata Jóa. En það eru fáir betri í þessari stöðu hér á landi heldur en okkar maður og las hann Hörð eins og Dagskránna og setti boltann í horn. Úr horninu náði Haraldur Freyr góðum skalla sem datt á þverslánna áður en hann fór yfir markið.

Selfoss var þó meira með boltann og reyndu hvað þeir gátu að sækja að marki gestanna. Rangstöðurnar urðu að ég held yfir tíu hjá þeim í leiknum og náðum við ekki að snúa á hana fyrr en Viðar Örn Kjartansson kom inná. Hann var ekki búinn að vera margar mínútur inná þegar hann slapp einn í gegnum vörn Keflvíkinga og var felldur inn í teig af Lasse Jörgensen. Markmaðurinn líklega smá heppinn að fjúka ekki útaf þarna en sú regla svosem allt of ströng enda brotið ekki gróft, allavega lét Gunnar Jarl vítið nægja.

Á punktinn fór Viktor Unnar Illugason sem var búinn að lofa því í viðtali fyrir leik að hann myndi skora í leiknum. Það gerði hann af miklu öryggi en var gert að taka vítið aftur. Það er aldrei talið þægilegt að þurfa að endurtaka víti en Viktor var líklega ekki búinn að frétta af því og hélt þess í stað að héti Sebastian Abreu (Urugay) og ákvað að vippa á mitt markið. Það dugði til að sjá við Lasse Jörgensen sem var farinn í sama horn og Viktor hafði veðjað á í fyrri spyrnunni. Algjörlega frábært mark hjá Viktori Unnari sem fagnaði vel ásamt áhorfendum og öllum sem voru í fjölmiðlagámun á Selfossvelli (semsagt mér einum).

Þeir fóstbræður Viðar og Viktor voru hvergi nærri hættir og þremur mínútum fyrir leikslok kláraði Viðar Örn leikinn fyrir heimamenn sem endanlega töpuðu sér á pöllunum. Viktor Unnar sendi boltan glæsilega innfyrir á Viðar sem var kominn einn í gegn og setti boltann örugglega í hornið. Aftur náði Viðar að sjá við rangstöðuvörn Keflvíkinga þó tæpt hafi það verið og vandaði Willum Þór þjálfari Keflvíkinga Gunnari Jarli dómara ekki kveðjunar í leikslok.

Á 90.mínútu var Viktor Unnar afar nálægt því að klára leikinn endalega er hann átti gott skot sem endaði í stönginni. Viðar Örn vann boltann sem datt ágætlega fyrir Viktor sem var óheppinn með skotið. Frákastið fór beint til Inga Rafns sem var í úrvalsfæri en Jörgensen varði vel í marki gestanna.

Fleira gerðist ekki í þessum frábæra opnunarleik á Selfossvelli, Babú stúkan fagnaði vel með liðinu í leikslok og ég er ekki frá því að sama hafi verið upp á teningnum í þétt setinni Thule stúkunni hinumegin við völlinn.

Please please please fleiri svona leiki strákar, þetta var gjörsamlega geðveikt eins og Viðar sagði eftir leik.

---

Selfoss: Jóhann Ólafur Sigurðsson, Martin Dohlsten, Agnar Bragi Magnússon, Jón Guðbrandsson, Guðmundur Þórarinsson, Gunnar Rafn Borgþórsson, Jean Stephane YaoYao, Arilíus Marteinsson, Jón Daði Böðvarsson, Sævar Þór Gíslason, Viktor Unnar Illugason.
Varamenn: Elías Örn Einarsson, Sigurður Eyberg Guðlaugsson, Davíð Birgisson, Ingi Rafn Ingibergsson. Einar Ottó Antonsson, Viðar Örn Kjartansson og Guessan Bi Herve.

Keflavík Lasse Jörgensen, Alen Sutej, Guðjón Árni Antoníusson, Haraldur Freyr Guðmundsson, Einar Orri Einarsson, Guðmundur Steinarsson, Magnús Sverrir Þorsteinsson, Magnús Þórir Matthíasson, Bjarni Hólm Aðalsteinsson, Hólmar Örn Rúnarsson, Hörður Sveinsson.
Varamenn: Ómar Jóhansson, Ian Paul McShane, Jóhann Birnir Guðmundsson, Andri Steinn Birgisson, Bojan Stefán Ljubicic, Brynjar Örn Guðmundsson og Magnús Þór Magnússon.

---

Dómari: Gunnar Jarl, átti mjög góðan dag og á mest allt það hrós sem hann hefur fengið undanfarið skilið miðað við þennan leik, sama hvað svekktur Willum sagði eftir leik á Stöð 2 Sport.
Áhorfendur: 1.239
Aðstæður: Frábærar, nýr og þ.a.l. auðvitað áður ónotaður völlur, ný stúka, stilt veður og rúmlega 15 stiga hiti.
Menn leiksins: Jóhann Ólafur Sigurðsson og Viðar Örn Kjartansson. Jói hélt okkur á lífi í leiknum og Viðar breytti leiknum gjörsamlega. Yao Yao var annars líka mjög öflugur sem og Viktor Unnar sem var t.a.m. maður leiksins hjá Vísi.is. Þess ber þó að geta að hann var með kvóta á einkunnir blaðamaður visis.is og fór því sparlega með þær.

---

Þar með höfum við það, 19.ágúst einn besti dagur ársins, ekkert nýtt undir sólinni þar. Við erum ennþá á lífi í deildinni þó baráttan sé gríðarlega hörð og fleiri svona úrslit nauðsyn. Liðið getur þetta svo sannarlega alveg og sýndi það í kvöld. Stuðningurinn hefur verið góður í allt sumar og ég efa ekki að hann verði það áfram er við förum á Laugardalsvöll og spilum við Fram, það er ekki á hverjum áratug sem við spilum á Laugardalsvelli, þeim misheppnaða þjóðarleikvangi.

Sjáumst á mánudaginn

Áfram Selfoss

Babú

Deila

Fyrsti leikur á nýjum grasvelli hefst klukkan 19:15 en það er mæting hálftíma fyrr enda þarf að vígja mannvirkið

Eins og sjá má er búið að klára fyrsta áfanga að stúkunni og nú eru sæti fyrir 730 manns plús það að Tóti Ingólfs, David Vokes og fleiri geta aftur farið að horfa á leikina í Thule stúkunni (Gesthúsmegin) :) En það sem mestu skiptir er að núna er búið að taka þetta asnalega síki sem var í kringum völlinn áður og aðskilja fótboltann og frjálsarnar sem er ekkert nema frábært.

Áfram Selfoss

p.s að lokum sendi Már þetta á vegginn hjá mér á Facebook rétt áðan:

og er þetta hér með staðfest, Babú-stúkan.

Babú

Deila

Ný áhorfendastúka og nýr grasvöllur verða vígð með stuttri vígsluathöfn á Selfossvelli fimmtudaginn 19 ágúst fyrir leik Selfoss og Keflavíkur í úrvalsdeildinni í knattspyrnu og hefst hún klukkan 18.45. Nokkur stutt ávörp verða flutt og mun prestur blessa mannvirkið. Einnig munu 3 deildarmeistararnir frá 1966, bikarmeistarar 2.flokks 1967 og íslandsmeistarar frá 1967 heiðra með nærveru sinni. Vonast er til að stuðningsmenn muni mæta snemma á þennan tímamótaleik. Grasvöllurinn var fyrst tekinn í notkun 1965 og það er því núna 45 árum síðar að bæjarbúar fagna nýjum velli þegar karlalið Selfoss leikur sitt fyrsta tímabil í efstu deild og nýrri áhorfendastúku sem leysir gömlu góðu tréstúkuna af hólmi og grasbrekkurnar góðu. Það er von knattspyrnudeildar UMF Selfoss að stuðningsmenn Selfoss nær og fjær fjölmenni á Selfossvöll 19 ágúst.

Knattspyrnudeild UMF Selfoss

Deila

Stelpurnar unnu baráttuglatt lið Fjölnis nokkuð örugglega í toppslag B-riðils í kvöld, lokatölur voru 3-0 og vakti helst athygli að í liði Selfoss var Olga Færseth ein mesta markamaskína íslandssögunnar mætt í stað Katrínar sem sleit krossband fyrir stuttu og verður ekkert meira með liðinu í sumar. Dugir ekkert minna til enda Katrín farið hamförum í sumar.

Liðið var svona:

Bekkur: Brynja V, Aníta Guðlaugs, Íris Sverrisd (inn 65.mín), Bríet Ómars (inn 71.mín), Guðbjörg Una (inn 61.mín)

Það tók Olgu enda ekki langan tíma að minna á sig því eftir um kortersleik flikkaði besti maður vallarins Guðmunda Óladóttir boltanum innfyrir á Olgu sem þurfti ekki annað en leggja hann í netið. Vel gert hjá báðum og vel fagnað af ágætum fjölda áhorfenda sem mættu á völlinn í þetta úrvals fótboltaveður sem var á Selfossi í kvöld.

Tíu mínútum seinna átti Anna María ágætt skot sem hafnaði í stönginni á Fjölnismarkinu. Gestirnir bökkuðu nokkuð aftarlega í leiknum og gáfu fá færi á sér og gekk Selfyssingum nokkuð erfiðlega að finna glufu á vörn gestanna. Að sama skapi var sóknarþungi gestanna enginn og kom ekki skot á Selfossmarkið svo heitið getur fyrr en eftir rúmlega klukkutímaleik. Vörn og miðja hjá okkur var ákaflega traust í leiknum með fyrirliðan Þóru Margréti sem besta leikmann í öftustu línu og Anna Þorsteins stjórnaði leiknum alveg á miðjunni.

Á köflum í leiknum virtist sem stelpurnar hafi saknað Katrínar Ýrar og þeirrar yfirferðar og hraða sem hún býr yfir og væri annað óeðlilegt, en á móti var hin 16 ára Guðmunda út um allt í framlínunni og varnarmenn Fjölnis réðu lítið sem ekkert við hana þegar leið á leikinn. Á 50.mínútu átti hún hörkuskot fyrir utan sem fór framhjá markinu og stuttu seinna átti hún góðan sprett sem endaði með sendingu innfyrir, sendingin var svosem ekkert frábær en það skiptir ekki öllu máli þegar hrægammur eins og Olga Færseth er í teignum og skallaði hún boltann örugglega í netið, 2-0 fyrir Selfoss og game over.

Eftir rúmlega klukkutímaleik var markaskorarinn Olga Færseth tekin af velli undirrituðum til sárrar gremju enda hafði ég tilkynnt framkvæmdastjóranum Sveinbirni Mássyni fyrir leik að hún myndi skora þrennu í þessum leik. Skiljanlegt þó þar sem Olga hefur lítið sem ekkert spilað fótbolta í tæp 2 ár. Á móti hefði hún hæglega getað fengið víti í fyrri hálfleik er hún var fellld innan teigs án þess að nokkuð væri dæmt. Veðmálið við Sveinbjörn því tapað og hlítur hann að launum rútuferð aðraleiðina með SBS til Hveragerðis. Greyið.

Guðmunda hélt áfram að hrella vörn Fjölnis og var oft við það að sleppa í gegn upp á sitt einsdæmi, sem og hún gerði svo á 70.mínútu en lét Dagnýu Valgeirsdóttir ágætan markvörð Fjölnis verja frá sér. Frákastinu náði Íris Sverrisdóttir sem nýlega var komin inna fyrir Olgu og hún rendi boltanum í autt markið og staðan því orðin 3-0 fyrir Selfoss.

Á lokakaflanum komst Guðmunda tvisvar í gegn en lét Dagnýu verja frá sér í bæði skiptin. Þriggja marka sigur því staðreynd í leik þar sem Selfossliðið virtist aldrei spila að fullri getu, Guðmunda skipti sköpum í þessum leik og var klárlega maður leiksins og ekki skemmdi fyrir að hafa Olgu Færseth frammi sem virðist skora bara af gömlum vana. Eins verður að gefa leikmönnum á aftari helming vallarins mikið kredit fyrir þennan leik, það vill því miður stundum gleymast þegar andstæðingarnir ná varla skoti á markið, en þetta Fjölnislið er ágætt og því öflugt að loka svona gjörsamlega á þær.

Stelpurnar hafa þegar tryggt sér sæti í umspili um sæti í efstu deild en eiga þó eftir að fara til eyja þar sem þær spila við ÍBV í hálfgerðum úrslitaleik um efsta sætið í riðlinum. Eftir það er það afar spennandi umspil við Keflavík, Þrótt og auðvitað ÍBV.

Babú

Deila

Hvetjum alla til að mæta út á völl á morgun föstudag kl: 19:00 þegar stelpurnar spila síðasta heimaleik sinn í ár (áður en þær hefja leik í úrslitakeppninni) er Fjölnir kemur í heimsókn.

Nú er tækifæri til þess að sjá Olgu Færseth í Selfossbúning í fyrsta skipti en hún gekk í raðir Selfoss á dögunum eins og við höfum áður komið inná. Katrín Ýr er því miður með slitið krossband og mun ekki leika meira í ár.

Deila