Selfoss mun taka á móti Fram annað kvöld á Selfossvelli og hefst leikurinn kl.20:00. Selfosskonur mættu Frömmurum á Framvelli í fyrri umferð liðanna og hafði Selfoss betur þá 1-7 en staðan var 2-1 í hálfleik. Fram tapaði naumlega fyrir sterku liði ÍBV nú á dögunum 2-1 og því ljóst að Frammarar munu ekki gefa neitt eftir gegn toppliðunum tveimur.

Allir á völlinn annað kvöld að hvetja stelpurnar áfram Selfoss !!

Deila

Selfoss tapaði fyrir KR og Skjálfti tapaði fyrir Miðjunni í kvöld.

Það er lítið hægt að segja um leikinn í sjálfu sér. Eins og oft áður í sumar byrjuðum við af krafti vorum óheppnir að setja ekki mark strax á fyrstu mínútu og pressuðum vel.  Fengum einar fjórar hornspyrnur á fyrsta kortérinu og vorum ágengir, KR-ingar létu boltann ganga vel sín á milli og á 17 mín. fengu þeir horn og það er víst ávísun á hættu fyrir okkur, enda skoruðu KR-ingar sitt fyrsta mark og þar með var leikurinn búinn. KR tók yfirhöndina og völtuðu yfir fyrri hálfleikinn. Guðjón Baldvins kláraði leikinn með tveim nokkuð auðveldum og ódýrum mörkum.

KR missti Jordao Diogo útaf réttilega á 48. mín en það breytti engu. Það var ekki að sjá að við værum manni fleirri allan seinni hálfleikinn. Viktor Unnar, Martin,Jájá og Bóló spiluðu allir sína fyrsta leik fyrir liðið, Viktor byrjaði sprækur en  virtist þreytast fljótt, Martin var seigur og Jájá og Bóló stóðu sig ágætlega. Jói var góður í markinu og af útileikmönnunum okkar var Ottó skítseigur, Jón Daði hljóp og Agnar varðist ágætlega.

Það sem ég hef mestar áhyggjur af er hins vegar neikvæðnin og andleysið sem geislaði af áhorfendapöllunum.  Það heyrðist lítið sem ekkert frá okkar stuðningsmönnum og það er ekki gott. Liðið er í gífurlega erfiðri fallbaráttu, þeirri jöfnustu í mörg ár og þá er það ómetanlegt að hafa góðan stuðning. Ég persónulega held ekki að stuðningsmenn Selfoss séu gloryhunterar sem stökkva frá borði þegar illa gengur, en þegar liðinu gengur illa er mun betra að hvetja liðið áfram og syngja heldur en að beina athyglinni að andstæðingunum eða dómaranum. Næsti leikur er á Vodafone vellinum gegn Haukum það er 6 stiga leikur ef einhverntíman hefur verið 6 tíma leikur spilaður á þeim velli. Sá leikur er ekki fyrr en eftir versló svo við stuðningsmenn getum pústað aðeins, blótað því sem þarf að blóta og mætt svo í botnlausri stemmningu á Vodafonevöllinn og rifið liðið í gang með stuðning sem á sér engan líkan á Íslandi. Við vissum það öll að liðið myndi ströggla í sumar, við vorum í deild í fyrra þar sem við höfðum nokkra yfirburði en í Pepsideildinni erum við nánast undantekningalaust litla liðið og þá þarf að styðja vel við bakið á strákunum, ef ætlunin er að sitja og bölsóttast yfir því hvað liðið er að spila vitlaust, að þjálfarinn sé að gera allt rangt eða að dómarinn sé bjáni þá er betra að sitja heima við útvarpið.

ÁFRAM SELFOSS!

Deila

Það var það allavega bókstaflega ef maður dæmir út frá myndum Stöð 2 Sport frá leiknum. Við áttum lítið í KR-inga í kvöld því miður, nýir menn ekki búnir að slípast inn í liðið svo vægt sé tekið til orða og slæmur 0-3 skellur staðreynd.
Gerði umfjöllun hér og held að ég sé kominn með nóg af því að tala um þennan leik í bili.
Ninni vinur minn spurði hvort það væri ekki eins og að skrifa minningargrein að gera umfjöllun um svona tapleiki, hann var ekki langt frá því, svei mér þá!

Næst eru það Haukar á Hlíðarenda, við ætlum ekki að tapa þeim leik.

Frekari umfjöllun um þennan leik gæti dottið inn í vikunni.

Deila

Við tókum hana Anítu Guðlaugsdóttur á tal nú þegar deildin er rúmlega hálfnuð hjá stelpunum og gengi þeirra verið mjög gott í sumar og hafa stelpurnar tryggt sér sæti í úrslitakeppninni. Þær eiga því góðan möguleika á því að spila í úrvalsdeild kvenna að ári.

Aníta G. fyrirliði Selfoss

Nú þegar mótið er rétt rúmlega hálfnað hefur kvennalið Selfoss ekki tapað leik og unnið flesta þeirra mjög stórt og sannfærandi. Kemur þér gott gengi liðsins á óvart?

Við vorum með gott lið í fyrra en við erum með enn betra lið í ár. Áður en mótið hófst í fyrra gerðum við ráð fyrir að tapa stigum á móti sterkustu liðunum og settum okkur markmið út frá því en á þessu tímabili hafa stigin ekki verið í mikilli hættu. Riðlarnir í 1. deild kvenna voru mun jafnari í fyrra heldur en í ár. Með því að líta á stigatöflurnar í báðum riðlunum  eins og staðan er núna þá lítur þetta út fyrir að vera tveggja liða mót í sitt hvorum riðlinum því samkeppnin virðist ekki vera mikil. Gengi okkar í sumar kemur ekki mikið á óvart því langflestar náðu að æfa vel í vetur og árangurinn eftir því. Við getum ekki verið annað en sáttar með að vera með fullt hús stiga, eiga 4 leiki eftir og vera búnar að tryggja okkur í úrslitakeppnina. En það er meira sem við ætlum okkur og það vonandi gengur eftir.

Nú styrktu þið ykkur ekki mikið fyrir átökin í sumar og spilið mest megnis á heimamönnum og uppöldum Selfyssingum, það hlýtur að vera góð tilfinning og gefur ungum stelpum á Selfossi eitthvað til þess að líta upp til ?

Við fengum nýjan þjálfara í haust sem vildi vinna með þann mannskap sem væri til staðar og treysti okkur fyrir verkefninu. Við erum með Anítu Lísu á láni frá FH og hefur hún smollið vel inn í liðið og verið góð viðbót við hópinn. En annars erum við með svipaðan hóp og í fyrra, nokkrar hættu eftir síðasta tímabil en aðrar hafa stigið upp eftir meiðsli og styrkt hópinn. Helena hefur gefið yngri stelpum úr 3. flokki tækifæri þannig að stelpur úr yngri flokkunum eiga möguleika á að sýna sig þegar tækifærin gefast. Loksins hafa ungar stelpur á Selfossi eitthvað til þess að líta upp til og sjá að 2. flokkurinn er ekki endastöð hér á Selfossi eins og hefur verið í nokkuð mörg ár. Vonandi verður meistaraflokkur kvenna, gott gengi liðsins og metnaðarfullur þjálfari til þess að fleiri leikmenn skili sér upp í meistaraflokk. Það er mikilvægt fyrir frekari uppbyggingu og getum við verið stoltar af því núna að liðið okkar innihaldi nánast eingöngu heimastelpur.

Þið tókuð ÍBV hér heima 3-2 í miklum baráttu leik eftir að hafa lent 1-0 undir, sýnir þessi leikur kannski hvað það er mikill karakter í liðinu?

Leikurinn á móti ÍBV einkenndist af mikilli baráttu og samstöðu í liðinu. ÍBV komst í 1-0 eftir gott spil og smá einbeitingarleysi af okkar hálfu. Við svöruðum því með þýðingarmiklu marki á 43. mín og staðan því 1-1 í hálfleik. Við vorum svo mun ákveðnari aðilinn í seinni hálfleik og skoruðum 2 mörk og staðan var orðin 3-1 á 81. mín. En ÍBV náði að laga stöðuna í 3-2 rétt áður en góður dómari leiksins flautaði leikinn af. Þessi leikur er gott dæmi um hvað það er mikill karakter í liðinu því eftir að ÍBV komust í 1-0 þá lét einn leikmaður ÍBV það út úr sér að þetta væri komið hjá þeim. Við misstum aldrei trúna á verkefninu, spiluðum skipulagðan varnarleik og nýttum færin okkar. Það skilaði okkur sigri á móti sterku liði ÍBV.

Hvernig heldurðu að liðið eigi eftir að plumma sig í úrvalsdeild að ári ef svo verður?
Það er erfitt að segja til um það og sérstaklega með það fyrir augum að sjá nýliðana, Hauka og FH, sitja á botni úrvalsdeildarinnar. Það sýnir að bilið á milli úrvalsdeildar og 1. deildar er þó nokkuð og Selfyssingar ættu að kannast við það úr karlaboltanum. Við eigum efnilegan hóp og erum með þjálfara sem veit alveg út á hvað þetta gengur þannig að ef við förum upp í úrvalsdeild þá væri ekki óraunhæft að fyrsta markmiðið yrði að halda sér í deildinni og síðan væri hægt að byggja ofan á það. Framtíðin er björt í kvennaboltanum á Selfossi og það væri ekki leiðinlegt að enda sumarið á því að vinna sér sæti í úrvalsdeildinni og taka bikarinn fyrir 1. deildina.

Liðið komst í 8 liða úrslit í fyrra og var hársbreidd frá því að komast í 4 liða úrslit og hefðu þar af leiðandi mætt Völsungi. Selfoss hefði átt góðan möguleika á því að komast upp í úrvalsdeild í fyrra en hefði það verið of snemmt?

Við vorum svekktar í fyrra að klára þetta ekki á móti Haukum og komast áfram því við hefðum átt góða möguleika á móti Völsungi. En það hefði verið of snemmt fyrir okkar unga lið að fara upp í efstu deild með nýstofnaðan meistaraflokk eftir aðeins 1 tímabil í 1. deildinni. Tímabilið í fyrra var góð reynsla fyrir hópinn og hefur nýst okkur í sumar. Við viljum alltaf meira og gera betur og því er ljóst hvert liðið stefnir í ár.

Helena er greinilega að gera góða hluti á Selfossi, hvernig þjálfari er hún?

Helena hefur lyft kvennaboltanum á Selfossi á enn hærra plan sem er frábært fyrir okkur sem leikmenn, fyrir félagið og fyrir stelpurnar sem eru í yngri flokkunum. Það er ekki til í hennar orðabókum að gefast upp, sýna lélega spilamennsku og skora minna en 6 mörk í leikjum ;-) Helena er með góðar æfingar, mikið tempó er á æfingum og svo á hún það til að vera nokkuð léttlynd inn á milli þannig að það er lítið hægt að kvarta yfir þessari blöndu sem þjálfarinn býr yfir.

Það er nauðsynlegt að opinbera það hér á selfoss.org að Helena tók áskorun að ef við myndum vinna ÍBV að þá mættum við láta hana gera allan fjandann. Hún var orðin eitthvað smeyk og gaf okkur stuttan tíma til að finna upp á einhverju þannig að systurnar Veronika og Bríet tóku sig til og fengu sparigallann lánaðan frá mömmu þeirra og Helena stjórnaði okkur á æfingu í þessum glæsilega klæðnaði. Það er ekki hægt að neita því að erfitt var að taka hana alvarlega í þessari marglituðu dragt á æfingunni en hún má eiga það að þetta fer henni afar vel.

Helena tók áskorun

Nú eigið þið 4 leiki eftir í deildinni og við tekur svo úrslitakeppnin og stefnir allt í að Selfoss fari í hana, hversu mikilvægir eru þessir leikir sem eru framundan fyrir liðið?

Það varð ljóst eftir sigurinn á móti ÍR að við værum búnar að tryggja okkur í úrslitakeppnina og er gott að vita af því þegar 4 leikir eru eftir. Leikirnir sem við eigum eftir í deildinni eru heimaleikir á móti Fram og Fjölni og svo útileikir á móti Sindra og ÍBV. Það eru 12 stig í pottinum og mikilvægt að ná þeim öllum til að halda 1. sætinu í riðlinum.

Að lokum, getur þú útskýrt fyrir þeim sem ekki vita hvernig úrslitakeppnin fer fram og hvaða leið Selfoss-liðið þarf að fara til þess að ná sér í sæti í úrvalsdeild að ári ?

Úrslitakeppnin hefur tekið breytingum frá  því í fyrra en þá voru 8 lið sem komust í úrslitakeppnina, 4 lið úr hvorum riðli. Við lentum t.d. í 3. sæti okkar riðils í fyrra og fengum tækifæri til að koma okkur upp um deild og munaði litlu að það tækist. Núna komast 4 lið í úrslitakeppnina, 2 efstu lið úr hvorum riðli. Úr B riðli verða það Selfoss og að öllum líkindum ÍBV, en þeim vantar 1 stig til að tryggja sér sæti þar. Úr A riðli er Þróttur búið að tryggja sér í úrslitakeppnina og eins eru allar líkur á því að Keflavík verði þar líka. Liðið sem endar í 1. sæti A riðils mun spila heima- og útileik við liðið í 2. sæti B riðils og liðið í 1. sæti B riðils mun spila heima og úti við liðið í 2. sæti A riðils. Með samanlögðum sigri í heima- og útileikjunum tryggja sigurliðin sér sæti í Pepsi deild kvenna. Síðan fer fram úrslitaleikur milli þessara sigurliða um hvort liðið sigrar 1. deildina.

Eins og staðan er í riðlunum núna myndu annars vegar Selfoss og Keflavík mætast og hins vegar Þróttur og ÍBV. En enn eru 4 leikir eftir í B riðli hjá toppliðunum og 3 í A riðli þannig að of snemmt er að segja til um hvort þetta muni enda svona því toppliðin eiga eftir að mætast í báðum riðlunum.

Allir á völlinn á þriðjudaginn 27. Júlí, Selfoss – Fram, kl. 20:00 á Selfossvelli.

Stelpurnar hafa fagnað mikið í sumar- Mynd Sunnlenska.is - Gummi Kalli

Deila

„Við ætlum þar að spila við FH, KR og Keflavík…“ eitthvað á þessa leið hljómar lína í lagi frá Skjálfta sem þeir hafa sungið í yfir 2 ár. Alltaf þegar talað er um að komast upp í úrvalsdeild og hvað sé gaman við það er undantekningarlaust tekið fram hvað það er gaman að fá að mæta liðum eins og FH, KR, Val, (ÍA) o.s.frv. Í svona upptalningu er alltaf talið KR-inga með, sama hvar þeir eru í töflunni. Eðlilegt svosem enda stærsti klúbbur landsins og þeim fylgir mestur fjöldi stuðningsmanna hvort sem liðinu gegnur vel eða illa.

Því er alveg hægt að færa rök fyrir því að á sunnudaginn sé komið að einum stærsta leik ársins og þ.a.l. einum stærsta leik Selfoss frá upphafi (á við um flestalla leiki okkar þetta árið). Við fáum sjálfa KR-inga í heimsókn og búast má við því að þeir verði í miklu stuði enda mikið búið að ganga á í sumar og þá sérstaklega fyrir þennan leik.

Hinum geðþekka Loga Ólafssyni var sagt upp störfum (sama hvernig reynt er að fegra það) í síðustu viku og í hans stað er kominn Rúnar Kristinsson, einn besti knattspyrnumaður íslandssögunnar. Þó hann hafi verið yfirþjálfari þar sl. ár má búast við KR-ingum vel einbeittum og ákveðnum í að að sanna sig fyrir nýjum stjóra og eins vill liðið líklega svara fyrir fyrri leik liðanna, honum lyktaði með þeim hætti að þeir sem tóku upp leikinn fannst ekki ráðlagt að sýna úr honum enda trúir því ekki nokkur maður að myndatökumaður hafi gleymt að mæta á KR-völlinn.

Selfoss vann allavega frækinn sigur á KR-vellinum sem vakti töluverða athygli og ekki síður vakti rótburst Selfyssinga í stúkunni athygli enda var eins og Skjálfti hefði sett Miðjuna á mute í leiknum í hinni frábæru stúku KR-vallarins. Skjálfti þann dag er eitthvað það besta sem ég hef séð frá áhorfendum á íslandi. Flest öll önnur viðmið sem ég hef koma frá Miðjunni.

Miðjan er þegar farinn að undirbúa það sem þeir kalla road trip út á land (alla leið á Selfoss) og má fastlega búast við þeim í öllu sínu veldi á sunnudaginn til að sýna Skjálfta hvar Davíð (Axels) keypti ölið (Pepsi Max).

Það er því von okkar hér á Orginu að Skjálfti mæti snarbrjálaðir til leiks, bendi Miðjunni á að þeir kaupi ekkert ölið heldur séu svo gáfaðir að heita í höfuðuð á bjórtegund og rústi Miðjunni…aftur.

En þá að leiknum, það er afar erfitt að meta hvernig KR-liðið mun mæta til leiks, þeir eiga tvo góða í hverja stöðu og með nýjum stjóra er ekki ólíklegt að nýir menn fái sénsinn, jafnvel uppaldir KR-ingar. KR-liðið var að spila í síðustu viku gegn Karpaty í Úkraínu og tapaði 3-2, þar var liðið svona
En þar sem menn eru þreyttir og slíkt tippum við á með þó nokkru öryggi að liðið verði svona:

Byrjunarliðið:

Pétur Pétursson er tæpur, Hlynur Geir er auðvitað í banni og Daði Dervic er veikur og Kiddi Kær gefur ekki kost á sér.

Hér má sjá Dohlsten hræða líftóruna úr Inga Rafni.

Á liði Selfoss gæti síðan orðið algjör bylting, það eru fjórir nýir leikmenn komnir með leikheimild og búumst við fastlega við allavega þremur þeirra beint inn í byrjunarliðið, ef ekki öllum. Svona tippum við allavega á að liðið verði:

Byrjunarliðið:

Bekkur: Dóri Bjöss, Steini Púlla, Ómar Vald, Gísli Bjöss, Valli Reynis og Gylfi Sigurjóns.

Mark og miðverðir ættu að vera nokkuð pottþétt, svíinn er hægri bak og bara hlýtur að koma beint inn í liðið. Vinstramegin er spurning hvort Gummi Tóta eða Andri Freyr verði fyrir valinu en við setjum Gumma þar sem hann hefur verið þarna undanfarið.
Djúpa á miðjunni setjum við Einar Ottó og Já Já og mælum með því að miðjumenn andstæðinganna sign-i sig fyrir leik.
Jón Daði ætti að vera á hægri kannti, í holunni gætu Alli, Guðbrands, Gummi Tóta og Viktor Unnar allir komið inn og frammi er Sævar Gísla líklegastur þó samkeppnin hjá honum hafi aukist þó nokkuð í þessum leikmannaglugga.

Þetta er eins og áður segir afar mikið skot út í loftið enda vantar þarna inní menn eins og Kjartan, Inga Rafn, Ingþór, Jón Sveins og Viðar Kjartans. Eina sem er vitað er að Ingó Tóta er meiddur og Davíð Birgis má ekki spila þennan leik enda kappinn á láni frá KR.

Þessi leikur átti að vera opnunarleikur á nýja grasvellinum hérna á Selfossi og vígja átti stúkuna með pomp og prakt en eins og áður hefur komið fram á þessari síðu verður ekkert af því, stúkan er ekki klár og völlurinn er tæpur þannig að leikið verður á gervigrasinu og vonandi verður það í síðasta sinn í sumar. Sveinbjörn Más framkvæmdastjóri segir allavega á fótbolta.net að stefnt sé á Keflavíkurleikinn 16.ágúst.

En það breytir því ekki að öflugustu útvarpsstöðvar tengdar knattspyrnuliðum, Suðurland FM og KR Útvarpið ætla að leiða saman hesta sína og hefja útsendingu á samtengdum rásum (96.3 fyrir okkur) klukkan 18:00 á sunnudaginn. Á þeim tíma munu þeir spjalla við þjálfara liðana, leikmenn og líklega einhverjar kempur sem verða þarna á vappinu.

En þetta er ekki allt því eins og áður segir stefnir allt í það að fulltrúi KR Útvarpsins verði goðsögnin sjálf, Bjarni Fel. Fyrir hönd Suðurland FM er auðvitað eftir sem áður Vignir Egill og hefur hann sagt að þetta sé álíka stór stund fyrir sig og þegar hann fékk að spila á balli með OFL ´99 og róta fyrir Skímó 2001.
Vignir er þó búinn að æfa sig lengi fyrir þetta tækifæri og muna eflaust einhverjir eftir snilldar lýsingum hans og Gísla Felix (Bjarna Fel-sonar) frá handboltanum sl. 2 vetur fyrir ca. 2 árum. (heiðursmaðurinn Addi Gunn hefur síðan auðvitað lýst handboltanum með Gísla Felix sl. 2 ár.)

Þannig að hvort sem þið ætlið að mæta á völlinn eða ekki þá er engin spurning um að stilla á Suðurland FM 96.3 á slaginu 18:00 og hlusta allan tímann.

Að lokum vil ég biðja dygga lesendur Selfoss.org afsökunar á að upphitun sé í umsjá undirritaðs og því ekki gáfulegri en þetta. Tómas sem hefur farið á kostum undanfarin ár með upphitanir sínar er að sýna allar sínar bestu hliðar á unglingamóti í Svíðþjóð, hér má einmitt sjá video sem sænska sjónvarpið náði af Tomma og nokkrum nýjum vinum hans og slatta af frændfólki.

Áfram Selfoss alla leið, bæði í blíðu og stríðu.
Leikur hefst 19:15
Vertu þar.
Babú

Deila

Það er gaman frá því að segja að allir fjórir nýju leikmenn Selfoss eru komnir með leikheimild fyrir leikinn gegn KR á sunnudaginn. Staðfestingu á þessu má sjá hér.

Nú er bara að læra þessi nöfn fyrir textalýsinguna!! Viktor Unnar er sérstaklega flókið!

Deila

Ásgeir Börkur stórvinur okkar úr Fylki var rétt í þessu að vinna sér inn annan Thule frá Selfoss.org!

Hér má sjá afhverju, og það er afar erfitt að sjá hvor er hvað, fótboltaleikmaðurinn eða listamaðurinn.

Sjón er sögu svo miklu ríkari

Deila

Viktor Unnar Illugason er genginn í raðir Selfoss frá Val. Þetta staðfesti Viktor í samtali við Fótbolta.net.

Viktor mun spila með Selfoss út þessa leiktíð og er löglegur með okkur á sunnudaginn gegn KR.

Viktor er 20 ára gamall framherji sem gekk í raðir Vals fyrir síðasta tímabil frá Reading.

Hann hóf meistaraflokksferil sinn árið 2006 er hann lék tíu leiki í Landsbankadeildinni og VISA-bikarnum fyrir Breiðablik.

Viktor glímdi svo við mikið af meiðslum hjá Reading og kom þá aftur heim.

Hann hefur ekki fengið mörg tækifæri undir stjórn Gulla Jóns eftir að hann tók við Valsmönnum í vor.

Hann er fjórði leikmaðurinn sem við fáum en liðið hefur fengið í þessum leikmannaglugga.

Deila

Svipur sem kemur beint frá Cambridge - Mynd Sunnlenska.is

Hér má síðan sjá fleiri myndir frá leiknum í Árbænum á sunnudaginn.

Deila

Stelpunar unnu í kvöld enn einn stórsigur sumarsins, núna lágu ÍR ingar í valnum á gervigrasinu á Selfossi og vakti það helst athygli að Katrín Ýr skoraði ekki í leiknum!! Engar áhyggjur samt, systir hennar skoraði þrjú!

Byrjunarliðið:

Bekkur: Lena, Íris, Brynja, Bríet, Guðbjörg og komu þær allar til sögu í leiknum.

Katrín var reyndar rétt búinn koma Selfoss yfir eftir 1.mínútu en markvörður ÍR varði vel frá henni. Þremur mínútum síðar lagði hún upp mark fyrir Gummu sem kom okkar stúlkum í 1-0. Anna Þorsteins bætti öðru marki við eftir um kortersleik og eftir um 25.mínútna leik var Anna María búinn að skora þriðja markið eftir góðan undirbúning frá Gummu. 3-0 í hálfleik.

Anna María í harði baráttu í leiknum í kvöld - Mynd Sunnlenska.is/Gummi Kalli

Þegar korter var búið af seinni hálfleik var Anna María búin að bæta 2 mörkum við. Hið fyrra eftir að hún komst í gegn og var ein á auðum sjó gegn markmanni og hið seinna eftir góðan undirbúning frá Gummu.

Stelpurnar sóttu síðan án afláts undir lokin og kórónað Gumma frábæran leik sinn með sínu öðru maki í leiknum og sjötta marki Selfyssinga á 87.mínútu.

Flottur sigur og frábært Selfosslið. (sjá frétt sunnlenska.is um leikinn hér).

Stelpurnar eru því enn í 1. sæti B-riðils með fullt hús stiga eða 30 stig og hafa skorað 59 mörk í sumar. Það gera tæplega 6 mörk í leik að meðaltali sem verður að teljast nokkuð gott! (sjá stöðu í riðli hér hægra megin á síðunni)

Næsti leikur stelpnanna er svo á þriðjudaginn þann 27.júlí gegn Fram á Selfossvelli

Deila